На японскім востраве Акінава адбыўся пажар у замку Сюры, які ўваходзіць у сьпіс спадчыны UNESCO, паведамляе агенцтва «Кіода Цусін». Агонь амаль цалкам зьнішчыў драўляны будынак. Пры тушэньні пацярпеў адзін пажарны.
У тушэньні ўдзельнічалі больш за сто чалавек, але ім перашкаджаў моцны вецер. Прычына ўзгараньня пакуль невядомая. Перад пажарам супрацоўнікі замку рыхтаваліся да сьвяточных мерапрыемстваў з нагоды культурнага фэстывалю, які там праходзіў.
Як паведамляе канал NKH, будынак ня быў абаронены сучаснымі супрацьпажарнымі сродкамі, паколькі рэканструкцыя адбывалася некалькі дзесяцігодзьдзяў таму.
Замак Сюры быў пабудаваны, як мяркуецца, у XIV або XV стагодзьдзі і служыў рэзыдэнцыяй манархаў дзяржавы Р’юкю. Згодна з афіцыйным турыстычным парталам Акінавы, будынак тройчы згараў падчас дынастыі Рʼюкю і быў цалкам зьнішчаны падчас Другой сусьветнай вайны.
Будынак быў адбудаваны зноўку ў 1992 годзе. У 2000 ён быў уключаны ў сьпіс сусьветнай спадчыны UNESCO.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў