Расейскі пісьменьнік і грамадзкі дзеяч, адзін з заснавальнікаў дысыдэнцкага руху ў СССР Уладзімір Букоўскі памёр вечарам 27 кастрычніка ў Кембрыджы (Вялікая Брытанія), паведамляе цэнтар, названы яго імем.
Уладзіміру Букоўскаму было 76 гадоў.
Уладзімір Букоўскі — крытык унутранай і замежнай палітыкі Расеі і прэзыдэнта Ўладзіміра Пуціна. У 2007 годзе ён вылучаўся кандыдатам у прэзыдэнты Расеі, але ў рэгістрацыі яму адмовілі. У 2009 годзе Букоўскі ўвайшоў у палітычную раду апазыцыйнага руху «Салідарнасьць». З 1976 году пісьменьнік жыў у Вялікай Брытаніі — пасьля таго, як СССР вызваліў яго з турмы, абмяняўшы на лідэра Камуністычнай партыі Чылі Луіса Карвалана ў выніку міжнароднай кампаніі падтрымкі дысыдэнта.
Да гэтага ён актыўна ўдзельнічаў у руху пратэсту савецкай інтэлігенцыі, за што неаднаразова быў арыштаваны і гвалтоўна шпіталізаваны ў псыхіятрычныя ўстановы.
У Брытаніі Букоўскі скончыў Кембрыдзкі ўнівэрсытэт па спэцыяльнасьці нэўрафізыялёгія і актыўна ўдзельнічаў у грамадзянскай дзейнасьці. Ён быў адным з ініцыятараў байкоту Алімпіяды 1980 году ў СССР.
Ён займаўся вызваленьнем савецкіх салдат, захопленых у Аўганістане.
У красавіку 2015 году Кембрыдзкая каралеўская пракуратура абвінаваціла яго ў стварэньні і захоўваньні «непрыстойных дзіцячых фатаздымкаў». У адказ Букоўскі падаў у суд на брытанскую пракуратуру, абвінаваціўшы яе ў паклёпе і перавышэньні службовых паўнамоцтваў.
У лютым 2018 году справа была прыпыненая.