У Пэкіне, на паўночнай ускраіне гораду, у пятніцу адбылося пахаваньне праху былога генэральнага сакратара ЦК Кітайскай кампартыі Чжао Цзыяна.
На цырымоніі, па дамоўленасьці з уладамі, прысутнічалі толькі блізкія сваякі нябожчыка, паведамляе BBC News.
Чжао Цзыян спрабаваў укараніць у эканоміку Кітаю рынкавыя прынцыпы, ён застаўся ў гісторыі як адзін зь вядучых рэфарматараў Кітаю.
Чжао Цзыян быў генэральным сакратаром Цэнтральнага камітэту кітайскай кампартыі з 1987 па 1989 гады. На Захадзе яго параўноўвалі зь Міхаілам Гарбачовым. Аднак, падтрымка выступленьняў студэнтаў на плошчы Т'яньаньмэнь летам 1989 году каштавала яму палітычнай кар’еры.
Чжао Цзыян выступаў за мірны спосаб ўрэгуляваньня патрабаваньняў, вылучаных пратэстуючымі. Але верх узялі прыхільнікі жорсткага падаўленьня маніфэстацыі.
Генэральны сакратар ЦК КПК быў адхілены ад удзелу ў жыцьці партыі, яму было забаронена займаць якія-небудзь пасады. З 1989-га году і да сваёй сьмерці ў 2005-м Чжао Цзыян пражыў пад хатнім арыштам.
