Паводле ўдакладненых дадзеных, пяць грамадзян Беларусі загінулі і яшчэ пяцёра пацярпелі пры сутыкненьні мікрааўтобуса і грузавіка ў Калускай вобласьці, паведаміў «РИА Новости» прадстаўнік экстраных службаў рэгіёну.
Раней паведамлялася пра чатырох загінулых.
«Пацярпелі дзесяць чалавек — грамадзяне Рэспублікі Беларусь, пяць зь іх загінулі», — сказаў суразмоўца агенцтва.
Паводле яго, трое пацярпелых шпіталізаваныя ў бальніцы Калускай вобласьці, яшчэ двум мэдыцынская дапамога была аказаная амбуляторна.
Паводле папярэдніх дадзеных МУС Расеі, 10 кастрычніка на 202-м кілямэтры аўтадарогі М-3 «Украіна» каля расейскага гораду Калуга мікрааўтобус Mercedes Sprinter пры развароце сутыкнуўся з фурай, якая ехала ў тым жа напрамку, і зьехаў у кювет.