Лінкі ўнівэрсальнага доступу

Мінабароны прызнала тры суіцыды вайскоўцаў-кантрактнікаў з пачатку году. Што гэта за выпадкі?


Уладзімер Макараў, начальнік упраўленьня інфармацыі галоўнага ўпраўленьня ідэалягічнай работы Міністэрства абароны Рэспублікі Беларусь
Уладзімер Макараў, начальнік упраўленьня інфармацыі галоўнага ўпраўленьня ідэалягічнай работы Міністэрства абароны Рэспублікі Беларусь

Начальнік упраўленьня інфармацыі Міністэрства абароны Беларусі Ўладзімер Макараў падчас стрыму 8 кастрычніка расказаў, што з пачатку 2019 году ў войску Беларусі было тры самагубствы.

Паводле Макарава, суіцыды ўчынілі вайскоўцы-кантрактнікі, усе тры выпадкі — ад «выключна асабістых перажываньняў» і бяз сувязі з праходжаньнем службы, перадае Tut.by.

«Я б мог агучыць прычыны ў кожным выпадку сёлетнім, але ня буду, — казаў Макараў. — Вось летась, напрыклад, 27-гадовы мужчына — ну хто мог зь яго зьдзекавацца? Там былі гіганцкія банкаўскія пазыкі і вельмі няпростая сямейная сытуацыя».

Пра якія выпадкі кажа Макараў? Магчыма, пад самагубствам летась мелася на ўвазе здарэньне з 26-гадовым вайскоўцам, цела якога знайшлі ў лесе на Горадзеншчыне 8 верасьня 2018 году.

А сёлета:

  1. 2 ліпеня стала вядома пра самагубства кантрактніка ў Горадзенскім гарнізоне — паводле Telegram-каналу Nexta, Фёдар Б. 1998 году нараджэньня родам зь Любані, які служыў у 3-й роце 202-га батальёну 6-й асобнай мэханізаванай брыгады, 1 ліпеня прыняў 100 таблетак но-шпы.
  2. З чэрвеня 40-гадовы прапаршчык Полацкага памежнага атраду застрэліўся на працоўным месцы.
  3. 1 чэрвеня скончыў жыцьцё самагубствам вайсковец слонімскай 11-й мэханізаванай брыгады, які праходзіў службу па кантракце (паводле Nexta, быў выпраўлены на парад у Менск).
  4. 14 траўня суіцыд зрабіў памежнік у Смаргонях. Цела 34-гадовага вайскоўца-кантрактніка знайшлі сваякі ў доме бацькоў.

Усе гэтыя выпадкі афіцыйна пацьвярджаліся: першы і трэці Міністэрствам абароны, другі і чацьвёрты — Памежным камітэтам.

Акрамя таго, вядома, што 13 красавіка 21-гадовы салдат тэрміновай службы выпаў з акна казармы 120-й асобнай мэханізаванай брыгады, але выжыў. Сьледчы камітэт тады паведаміў пра завядзеньне крымінальнай справы паводле артыкулу «давядзеньне да самагубства».

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG