У Брагінскім раёне на Гомельшчыне на Дняпры пабудуюць рачны порт для выхаду да Чорнага мора, паведаміў БелаПАН намесьнік старшыні Брагінскага райвыканкама Пётр Раманюк.
Інвэстыцыйны дагавор падпісаны гэтым летам паміж Міністэрствам транспарту і камунікацый Беларусі і кампаніяй «Белпорт Ніжнія Жары».
Акрамя порта ў раёне вёсак Верхнія і Ніжнія Жары на плошчы 280 га прадугледжваецца таксама будаўніцтва лягістычнага цэнтра і іншай інфраструктуры. Кошт праекта складае 64 млн даляраў, у тым ліку будаўніцтва порта абыдзецца ў 22 млн. Работы павінны быць завершаныя ў 2025 годзе.
Мяркуецца, што да порта грузы будуць дастаўляць кантэйнэрамі, а далей — па рацэ ва Ўкраіну аж да Чорнага мора. У пэрспэктыве ад порта плянуюць пабудаваць чыгунку да Хойнікаў. Гэта можа каштаваць дадаткова 100 млн даляраў, паведаміў Раманюк.
ААТ «Белпорт Ніжнія Жары» зарэгістраванае ў красавіку мінулага года. Кампанію зьвязваюць з адным з уладальнікаў сеткі «Гіпа» Васілём Варфаламеевым. Ён зьяўляецца генэральным дырэктарам кампаніі «Белпаліваэнерга», якая ў сьнежні мінулага года заключыла мэмарандум з Адміністрацыяй марскіх партоў Украіны аб аднаўленьні рачнога суднаходзтва паміж Беларусьсю і Украінай.
