У Ганконгу адзін з удзельнікаў масавай акцыі пратэсту, прымеркаванай да 70-й гадавіны ўтварэньня КНР, атрымаў агнястрэльнае раненьне ў грудзі. Паведамленьні СМІ пацьвердзіла паліцыя. Яна сьцьвярджае, што паліцэйскі страляў у мэтах самаабароны.
Мэдыкі пацьвердзілі, што ў сутыкненьнях былі параненыя ня менш за 15 чалавек, адзін з іх у крытычным стане — як сьцьвярджаецца, гэта менавіта ён атрымаў агнястрэльнае раненьне.
Раней паліцыя, па яе сьцьвярджэньнях, толькі страляла ў паветра, каб разагнаць людзей.
Сутыкненьне ў Ганконгу ў аўторак — адно з самых жорсткіх за апошнія месяцы. У розных раёнах гораду ўдзельнікі акцый пратэсту ўзводзілі барыкады, супраць паліцэйскіх выкарыстоўваліся «кактэйлі Молатава». Паліцыя ўжывала сьлёзацечны газ, вадамёт, гумовыя кулі. Было зачынена мноства станцый мэтро.
Пратэсты ў Ганконгу працягваюцца больш чатырох месяцаў. Дэманстранты спачатку дамагаліся адмены разгляду закона аб экстрадыцыі абвінавачаных у злачынствах у мацерыковы Кітай.
Затым патрабаваньні пашырыліся. Галоўнае зь іх — захаваньне аўтаноміі горада і адстаўка ганконскіх уладаў. Гучаць і патрабаваньні незалежнасьці ад Кітая. Кітайскія ўлады асуджаюць пратэсты і пагражаюць іх удзельнікам жорсткімі мерамі.
