Атрад якуцкага шамана Аляксандра Габышава, які працягваў паход у Маскву пасьля яго затрыманьня, у сераду, 25 верасьня, абвясьціў аб роспуску і завяршэньні паходу. Пра гэта рэдакцыі «Сибирь. Реалии» паведаміў адзін з удзельнікаў Віктар Ягораў.
Паводле яго, у аўторак вечарам у лягер прыхільнікаў шамана прыехала група невядомых у цывільным і павезла некалькі чалавек у аддзяленьне паліцыі. Там ім заявілі, што, калі атрад ня будзе распушчаны, іх абвінавацяць у тэрарызьме, а лягер будзе ўзяты штурмам у сераду раніцай. У выніку прыхільнікамі шамана было прынята рашэньне аб роспуску групы і спыненьні паходу. Аднак, паводле афіцыйнай вэрсіі, аб роспуску атраду па тэлефоне папрасіў сам Габышаў, расказаў Ягораў.
Аляксандар Габышаў у сакавіку адправіўся ў Маскву для правядзеньня «абраду выгнаньня Пуціна». Яго затрымалі 19 верасьня на мяжы Бураціі і Іркуцкай вобласьці. Раніцай 20 верасьня ён быў дастаўлены ў Якуцк, а пасьля — у псыханэўралягічны дыспансэр рэспублікі. Супраць шамана распачалі крымінальную справу аб закліках да экстрэмізму.
У праваабарончай арганізацыі Amnesty International якуцкага шамана назвалі вязьнем сумленьня і запатрабавалі яго вызваленьня.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў