Лінкі ўнівэрсальнага доступу

Закапалі жыўцом: у суд перадалі справу аб полацкім забойстве з удзелам трох падлеткаў


Месца забойства, 22 красавіка

Сьледчы камітэт Беларусі паведаміў пра завяршэньне расьсьледаваньня крымінальнай справы аб забойстве ў Полацку, учыненым ноччу 22 красавіка.​

Паводле сьледчых, той ноччу ў забітага 26-гадовага мужчыны ў гасьцях былі тры хлопцы, яны ўсе расьпівалі сьпіртное. Госьці пасварыліся з гаспадаром, нанесьлі яму цялесныя пашкоджаньні лапатай, скралі маёмасьць, а каб утаіць злачынства, закапалі цела гаспадара ў двары.

«Згодна з заключэньнем камісійнай судова-мэдычнай экспэртызы, сьмерць пацярпелага наступіла ад мэханічнай асьфіксіі ў выніку закрыцьця дыхальных шляхоў грунтам і ад адкрытай чэрапна-мазгавой траўмы, — пішуць сьледчыя. — Гэта сьведчыць пра тое, што мужчына быў пахаваны жыўцом».

Усе тры фігуранты пад вартай. Дзеяньні 17-гадовага і 18-гадовага абвінавачаных кваліфікавалі паводле ч.3 арт. 207 КК РБ (разбой, учынены групай асобаў, з нанясеньнем цяжкага цялеснага пашкоджаньня) і ч.2 арт. 139 КК РБ (забойства з асаблівай жорсткасьцю, учыненае групай асобаў, спалучанае з разбоем). Матэрыялы справы накіравалі ў суд.

Асобна вылучаная крымінальная справа адносна трэцяга фігуранта, якому 20 гадоў. Ён таксама прыцягнуты ў якасьці абвінавачанага, але ў Расеі і паводле расейскага заканадаўства — за «наўмыснае нанясеньне цяжкай шкоды здароўю, што пацягнула за сабой сьмерць па неасьцярожнасьці». Цяпер разглядаюць пытаньне аб яго экстрадыцыі ў Беларусь.

Паводле ч.2 арт. 139 КК РБ прадугледжаныя пакараньні аж да пажыцьцёвага зьняволеньня і расстрэлу. Але сьмяротнае пакараньне ў Беларусі ўжываецца толькі да тых, хто ўчыніў злачынства пасьля надыходу 18 гадоў (на момант злачынства маладзейшым было 16 і 17 гадоў). Непаўналетнім могуць прысудзіць максымум 12 гадоў турмы. За забойства празь неасьцярожнасьць могуць асудзіць на тэрмін да 15 гадоў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG