Лінкі ўнівэрсальнага доступу

Нацбанк: рэгуляваныя цэны растуць хутчэй за свабодныя


Ілюстрацыйнае фота
Ілюстрацыйнае фота

Экспэрты Нацыянальнага банку падлічылі ўзровень інфляцыі ў жніўні. Згодна з разьлікамі, у мінулым месяцы гадавы прырост спажывецкіх цэнаў запаволіўся на 0,3% і склаў 5,7%.

Паводле Нацбанку, на запаволеньне гадавых тэмпаў росту спажывецкіх цэнаў у жніўні зрабіла ўплыў адпаведная дынаміка сэзонных цэнаў, а таксама рэгуляваных тарыфаў.

Гадавая базавая інфляцыя апошнія тры месяцы захоўваецца на ўзроўні 4,7-4,8%. Сярэдняя інтэнсіўнасьць прыросту спажывецкіх цэн у жніўні зьменшылася адносна ліпеня на 0,1% і склала 4,2%.

Рэгуляваныя цэны і тарыфы ў жніўні замарудзіліся ў гадавым вымярэньні на 0,3% да 8,4%. Разам з тым іхная дынаміка ў цэлым апярэджвае дынаміку свабодных цэнаў. У найбольшай ступені выраслі цэны і тарыфы на паслугі дашкольных устаноў (на 20,8%), вышэйшай адукацыі (на 14,9%), а таксама аўтамабільнае паліва (на 17,5%).

Пасьля істотнага паскарэньня ў папярэднім месяцы тэмпы росту цэнаў на садавіну і гародніну ў жніўні замарудзіліся ў гадавым вымярэньні да 6,2%. Гэтаму шмат у чым спрыяла зьніжэньне цэнаў на таматы пасьля іхнага нехарактэрнага падаражаньня ў ліпені.

У адпаведнасьці з Асноўнымі парамэтрамі сацыяльна-эканамічнага разьвіцця Беларусі на 2019 год, гадавы ўзровень інфляцыі вызначаны на ўзроўні 5%. Годам раней гэты паказьнік складаў 6%.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG