Лінкі ўнівэрсальнага доступу

Прэзыдэнт Чэхіі заявіў, што хацеў бы адклікаць прызнаньне незалежнасьці Косава


Мілаш Зэман

Прэзыдэнт Чэхіі Мілаш Зэман заявіў, што хацеў бы адклікаць прызнаньне Косава як сувэрэннай дзяржавы.

Падчас візыту ў сталіцу Сэрбіі, Бялград, Зэман паабяцаў абмеркаваць гэты крок з чэскімі заканадаўцамі. Сам прэзыдэнт ня можа адклікаць прызнаньне незалежнасьці дзяржавы.

«Нядаўна Гааскі трыбунал апублікаваў паведамленьне, у якім выказвае падазрэньне ў ваенных злачынствах, учыненых прадстаўнікамі Косава, і я думаю, што прэм’ер-міністар падаў у адстаўку праз гэта. Дазвольце мне сказаць, што дзяржава, якой кіруюць ваенныя злачынцы, не павінна быць сярод дэмакратычных краін», — сказаў Зэман.

У ліпені прэм’ер-міністар Косава Рамуш Харадынай падаў у адстаўку пасьля таго, як быў выкліканы ў якасьці падазраванага ў спэцыяльны трыбунал у Гаазе для расьсьледаваньня злачынстваў, учыненых падчас вайны ў Косаве 1998-1999 гадах. Харадынай не прызнаў сябе вінаватым, але падкрэсьліў, што не можа ехаць у суд, выконваючы функцыі прэм’ер-міністра.

У адказ на словы Зэмана, Косава адмовілася ўдзельнічаць у саміце, які адбудзецца 12 верасьня ў Празе. Там маюць прысутнічаць прадстаўнікі некалькіх заходнебалканскіх краін і прэм’ер-міністры чатырох краін Эўразьвязу — Чэхіі, Вугошчыны, Польшчы і Славаччыны.

Косава абвясьціла незалежнасьць ад Сэрбіі ў 2008 годзе. Яе прызнала большасьць заходніх краін, у тым ліку ЗША. Эўразьвяз спрабуе пераканаць Бялград і Прышціну нармалізаваць адносіны, але перамовы не далі значных вынікаў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG