Восем дзяцей загінулі падчас нападу на школу на ўсходзе Кітаю ў першы дзень заняткаў.
Як паведамляе CNN са спасылкай на мясцовыя ўлады, 40-гадовы мужчына 2 верасьня напаў на школьнікаў, якія ішлі на заняткі ў горадзе Эньшы ў правінцыі Хубэй.
Нападніка затрымалі.
Восем дзяцей загінулі, двое параненыя. Падрабязнасьці нападу і ўзрост дзяцей не паведамляюцца. Аднак вядома, што гаворка пра пачатковую школу — у Кітаі дзеці вучацца ў ёй ад 6 да 13 гадоў.
Мясцовая паліцыя разьмясьціла на кітайскай сацыяльнай сетцы Weibo паведамленьне пра напад. Аднак пазьней яго выдалілі без тлумачэньняў.
Напады на дзяцей у Кітаі адбываюцца ня першы раз. Летась у кастрычніку 39-гадовая жанчына парэзала кухонным нажом 14 дзяцей ў дзіцячым садку ў горадзе Чунцын у правінцыі Сычуань. У красавіку 2018 году дзевяць вучняў загінулі, калі мужчына напаў на іх з нажом у правінцыі Шэньсі.
