Такое рашэньне ўхваліў Першамайскі раённы суд сталіцы Кіргізстану Бішкека.
Паводле раённага суду, былы прэзыдэнт Кіргізстану Алмазьбек Атамбаеў падазраецца ў карупцыйным злачынстве і будзе ўтрымлівацца ў СІЗА Дзяржаўнага камітэту нацыянальнай бясьпекі.
У судзе ўдакладнілі, што такая мера стрыманьня выбраная ў рамках дасудовага вядзеньня справы аб незаконным вызваленьні крымінальнага аўтарытэта Азіза Батукаева ў 2013 годзе.
Алмазьбека Атамбаева затрымалі 8 жніўня ў яго дома ў вёсцы Кой-Таш пад Бішкекам у выніку спэцапэрацыі. Раней яго тройчы выклікалі на допыт, але ён не зьявіўся. Ягоны адвакат Сяргей Сьлесараў прычынай няяўкі называў незаконнасьць позваў, бо ягоны кліент да гэтага часу мае імунітэт экс-прэзыдэнта.
Чаму затрымалі былога прэзыдэнта Кіргізстану?
Трэцяга прэзыдэнта Кіргізстану Алмазьбека Атамбаева затрымалі 8 жніўня ў выніку 2-дзённай спэцапэрацыі. Прыхільнікі былога прэзыдэнта супраціўляліся спэцназаўцам. У выніку сутычак пацярпелі больш 80 чалавек, адзін з байцоў спэцназу загінуў.
- У 2017 годзе пасьля сыходу Атамбаева ў адстаўку на некалькіх бліжэйшых паплечнікаў Атамбаева былі заведзены крымінальныя справы, у асноўным па абвінавачваньнях у карупцыі. Атамбаеў пасьля гэтага адкрыта перайшоў у апазыцыю да цяперашняй улады.
- У чэрвені 2019 году Атамбаева пазбавілі недатыкальнасьці і статусу экс-прэзыдэнта. Генпракуратура падазрае яго ў карупцыі і ўжо тройчы выклікала былога прэзыдэнта на допыт у якасьці сьведкі. Але Атамбаеў на допыты не зьяўляўся, лічачы, што яго пазбавілі недатыкальнасьці незаконна.
Што стала зь іншымі прэзыдэнтамі Кіргізстану?
- Другі прэзыдэнт Кіргізстану Курманбек Бакіеў уцёк з краіны ў Беларусь падчас пратэстаў 2010 году.
- Першы прэзыдэнт Аскар Акаеў у 2005 годзе склаў зь сябе паўнамоцтвы ў выніку «цюльпанавай рэвалюцыі». Пры дапамозе спэцслужбаў Акаеву ўдалося выехаць з тэрыторыі Кіргізстану. Каля 14 гадоў ён жыве ў Расеі, займаецца навуковай дзейнасьцю.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў