Лінкі ўнівэрсальнага доступу

Менчукі змогуць бясплатна атрымаць «пашпарты здароўя». Выдаткі аплаціць Эўразьвяз


Фрагмэнт постэра UNICEF

Эўрапейскі Зьвяз бярэ на сябе фінансаваньне маратону здаровага ладу жыцьця «САД — Спартыўны. Актыўны. Даступны», які стартуе ў Менску ў жніўні.

«Пакуль немагчыма сказаць, у якую дакладна суму выльецца гэтая акцыя. Але гэта той выпадак, калі грошай не шкада. Маратон прыцягне ўвагу грамадзтва да здароўя і прафіляктыкі захворваньняў. Усе складнікі „САДу“ вельмі важныя, бо здароўе павінна быць даступным для ўсіх», — сказала Свабодзе намесьніца прадстаўніка Дзіцячага фонду ААН (UNICEF) у Беларусі Габрыэла Акімава.

Акцыя стартуе ў Менску ў чацьвер, 1 жніўня. Кожны чацьвер да канца месяца на базе Рэспубліканскага цэнтру алімпійскай падрыхтоўкі па фрыстайле ўсе ахвотныя могуць бясплатна паспрабаваць свае сілы ў розных відах фізычнай актыўнасьці.

Адзіная папярэдняя ўмова — адкрыць асабісты «пашпарт здароўя». Атрымаць яго можна на месцы, прайшоўшы экспрэс-дасьледаваньне лекараў.

«Удзельнікаў акцыі пракансультуюць з выкарыстаньнем „разумнай вагі“. Вызначаюцца доля тлушчавай тканкі, шчыльнасьць мінэральнай тканкі касьцей, а таксама мышачная маса», — сказала журналістам галоўны ўрач 39-й гарадзкой клінічнай паліклінікі Менску Вольга Есьманчык.

Арганізатары маратону падрыхтавалі розныя прызы. Так, у кінатэатрах Silver Screen уладальнік «пашпарта здароўя» за першы квіток плаціць поўную суму, а за другі — усяго адну капейку.

Зарэгістравацца і пазнаёміцца з раскладам заняткаў можна на сайце акцыі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG