Лінкі ўнівэрсальнага доступу

Мэтрапалітэн перадумаў здымаць бел-чырвона-белую рэкляму Symbal.by


Рэклямны банэр беларускай патрыятычнай кармы symbal.by «Родная Беларусь»

Рэклямны банэр беларускай патрыятычнай крамы Symbal.by «Родная Беларусь» застанецца на сваім месцы. Раней дырэктар крамы Павал Белавус у «Фэйсбуку» паведаміў, што праз два дні рэклямна-інфармацыйны аддзел Менскага мэтрапалітэну запатрабаваў ад агенцтва «Мэдыя Альянс» тэрмінова зьняць і замяніць яго.

Супрацоўніца рэклямнага агенцтва «Мэдыя Альянс» Аксана Пляшкевіч ўдакладніла, што зьняць ці замяніць банэр Symbal.by ім загадалі ў ноч на 1 жніўня, хоць дагэтуль разьмяшчэньне рэклямы абгаворвалася тэрмінам на 3 месяцы з магчымасьцю працягу. Аднак пасьля таго, як інфармацыя набыла шырокую агалоску, рашэньне было перагледжанае.

Гэта ў гутарцы са Свабодай пацьвердзіла і загадчыца рэклямна-інфармацыйнага аддзелу Менскага мэтрапалітэну Сьвятлана Зізіка.

«Вісіць банэр, у чым пытаньне? Не магу зразумець, што такое адбываецца, адкуль гэты шум? Калі ласка, хацелі на тры месяцы — хай рэклямуюцца. Я ня чула, каб ім былі нейкія прадпісаньні, паняцьця ня маю, пра што вы кажаце. Рэкляма будзе роўна столькі, колькі захоча «Мэдыя Альянс», — запэўніла кіраўніца рэклямна-інфармацыйнага аддзелу Менскага мэтрапалітэну.

Білборды з паэтам Уладзімерам Някляевым і акторам Юрыем Жыгамонтам, якія зьявіліся ў цэнтры Менску ў раёне плошчы Перамогі ў верасьні 2018 году і рэклямавалі тую ж краму, зьнялі празь некалькі гадзін. У рэклямнай кампаніі, зь якой Symbal.by супрацоўнічаў, Белавусу тады сказалі, што «зьвярнуліся з высокіх органаў і загадалі зьняць», але ў аддзеле кантролю за рэклямай упраўленьня гандлю Менгарвыканкаму сказалі, што «нікому нічога не забаранялі».

Пазьней рэклямная агенцыя «МК Реклама» адмовілася разьмяшчаць лайтпостэры крамы symbal.by зь вершамі Ўладзімера Някляева. Аўтарства паэта на плякатах пазначана не было.

У кастрычніку 2017 году, калі Павал Белавус хацеў разьмясьціць банэры symbal.by на скрыжаваньні праспэктаў Незалежнасьці і Машэрава, камісія «Менскрэклямы» адмовілася зацьвярджаць банэр, папрасіўшы прыбраць у слогане на плякаце «Крама, дзе жыве Беларусь» слова «жыве». Праз тыдзень крама адправіла на ўзгадненьне ў «Менскрэкляму» шэсьць новых варыянтаў банэраў, і ў выніку камісія зацьвердзіла два зь іх: «Крама, дзе дыхае Беларусь» і «Крама, дзе знойдзеш Беларусь».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG