Лінкі ўнівэрсальнага доступу

Дэпутат Ігар Мартынаў: Калі прызыўнік жыве за мяжой, ён абавязаны зьвязацца са сваім ваенкаматам


Ілюстрацыйнае фота

«Калі чалавек жыве за мяжой, ён павінен зьвязацца з ваенкаматам, паведаміць пра сваё месца жыхарства, — заявіў дэпутат Мартынаў. — Аб кожным прымаецца рашэньне індывідуальна. Калі чалавек зьяўляецца ў ваенкамат, праходзіць камісіі, ніхто яго ня будзе абмяжоўваць. У законапаслухмянага грамадзяніна ніякіх праблем ня будзе. Ёсьць 435-ы артыкул закону — аб ухіленьні ад службы».

Дэпутат таксама адзначыў, што абмежаваньне правоў і свабод грамадзянаў дапускаецца. Калі гэта зроблена ў інтарэсах нацыянальнай бясьпекі.

«Служба ў войску — гэта нацыянальная бясьпека, адзначыў Мартынаў. —Так што парушэньня Канстытуцыі аб абмежаваньні правоў і свабод грамадзян тут няма. Калі чалавек не зьяўляецца ў ваенкамат — ён парушальнік закону».

Таксама на прэс-канфэрэнцыі, прысьвечанай зьменам правілаў прызыву ў войска, адзначылі, што тэрміны абскарджаньня рашэньня прызыўной камісіі ў судзе будуць скарочаныя з 30 дзён да 7.

«Закон аб адтэрміноўках». Што важна ведаць

24 ліпеня Аляксандар Лукашэнка падпісаў закон «Аб зьменах законаў па пытаньнях эфэктыўнага функцыянаваньня вайсковай арганізацыі дзяржавы» (так званы «закон аб адтэрміноўках»).

Прыняты ў другім чытаньні законапраект прадугледжвае, што:

  • адтэрміноўку ад прызыву для працягу адукацыі ў Беларусі будуць даваць толькі адзін раз (калі адтэрміноўкай студэнт ужо скарыстаўся, то на час службы ва Ўзброеных сілах яму будзе давацца акадэмічны водпуск);
  • тым, хто «належным чынам» атрымаў позву аб прызыве, але ўхіляецца ад прызыву, абмяжуюць выезд за мяжу (паводле міністра абароны Раўкова, абмежаваньне на выезд будзе тычыцца і тых, каго ваенкамат не знайшоў і ня змог уручыць позву);
  • у вайсковым білеце могуць зрабіць пазнаку «адсутнасьць законных падставаў» для непраходжаньня службы, калі чалавек да 27 гадоў ухіляўся ад прызыву;
  • тых, хто мае такую пазнаку, ня будуць браць на дзяржаўную службу, у Міністэрства ўнутраных спраў і Міністэрства надзвычайных сытуацый, органы фінансавых расьсьледаваньняў Камітэту дзяржаўнага кантролю, Сьледчы камітэт і Камітэт судовых экспэртызаў;
  • замест разьмеркаваньня пасьля навучаньня ў ВНУ дазволяць служыць у войску па кантракце і не плаціць тады за адмову ад разьмеркаваньня.

Тэкст закону афіцыйна апублікаваны 30 ліпеня, асноўныя нормы набудуць моц праз 10 дзён. Гэта значыць, што прызыў, які адбудзецца ў жніўні-лістападзе, пройдзе паводле новых правілаў, але падобна, што ў тых, хто сёлета ўжо атрымаў адтэрміноўку і паступіў, напрыклад ,у магістратуру, права на адтэрміноўку адбіраць ня будуць.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG