Лінкі ўнівэрсальнага доступу

Чаму беларускія цягнікі сыходзяць з рэек? Тлумачыць спэцыяліст


Фота МНС Беларусі

Упраўленьне Беларускай чыгункі на сваім сайце паведамляе, што для расьсьледаваньня інцыдэнту на перагоне каля вёскі Замасточча пад Віцебскам, дзе напярэдадні з рэек сышло 18 цыстэрнаў з прапанам (адна зь іх працякла), стварылі спэцыяльную камісію. Прычына надзвычайнага здарэньня пакуль невядомая.

Гэта ўжо другі цягам 10 дзён падобны выпадак: 15 ліпеня на ўчастку Ворша — Менск з рэек сышло 7 вагонаў таварнага цягніка, пацярпелых не было.

Чаму цягнікі ў Беларусі сыходзяць з рэек? Свае вэрсіі Свабодзе агучыў Іван Галаўлёў, які цяпер на пэнсіі, а дагэтуль шмат гадоў кіраваў лякаматывам таварнага саставу.

Паводле адмыслоўца, найбольш імаверная прычына чыгуначных катастрофаў — пашкоджаньне хадавой часткі. Найперш гэта тычыцца паломкі бакавой рамы ў вагонным вазку, дзе мацуюцца колы. Калі літая жалезка адвальваецца і падае на рэйкі або ўпіраецца ў шпалы, паламаны вагон сыходзіць і цягне за сабой астатнія.

Як кажа спадар Галаўлёў, бракаваную дэталь знайсьці досыць цяжка: бакавая рама мае складаную форму і абсьледаваць кожны яе сантымэтар не ўяўляецца магчымым. Асноўныя дэфэкты хадавой часткі зьвязаныя зь «недалітым» мэталам, што аслабляе трываласьць вырабу.


Іншая імаверная прычына можа быць выкліканая няпоўным пераводам стрэлак. Цяпер гэтая функцыя аўтаматызаваная, аднак і аўтаматыка не гарантуе 100-адсоткавай дакладнасьці манэўру. Здараецца, стрэлка даводзіцца не да канца, што таксама можа прывесьці да сыходу цягніка з рэек.

Як кажа суразмоўца, ня трэба скідваць з рахункаў і чалавечы фактар. Калі машыніст лякаматыву выбірае няправільную хуткасьць пры ўваходзе ў паварот (як правіла, вышэйшую за дапушчальную), вагоны ці цыстэрны могуць вылецець з рэек.

Нарэшце, нездавальняючы стан дарог. На думку Івана Галаўлёва, хоць дагляд у Беларусі арганізаваны добра, тым ня менш краіна ахутаная тысячамі кілямэтраў сталёвых рэек, і брыгады пуцявых рабочых мусяць штодзень падтрымліваць чыгуначную гаспадарку ў спраўным стане. Аднак калі раптам пад палатном у выніку залевы прасядзе зямля і рэйкі дэфармуюцца, гэта падвышае рызыку непажаданых наступстваў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG