Лінкі ўнівэрсальнага доступу

Пад Глыбокім паставілі помнік на магіле журналіста Свабоды Язэпа Барэйкі


Надмагільны помнік дыктару Свабоды Язэпу Барэйку ля Глыбокага. Фота: Уладзімер Скрабатун

У Гірстунах, што недалёка ад Глыбокага, паставілі надмагільны помнік журналісту і дыктару Свабоды, гісторыку і дзеячу беларускай міграцыі Віктару Сянкевічу (сапраўднае імя якога — Вінсэнт Сенькавец, а псэўданім на Свабодзе — Язэп Барэйка).

Як адзначае рэдактар газэты «Вольнае Глыбокае» Ўладзімер Скрабатун, помнік пастаўлены на сямейным пахаваньні — побач зь Віктарам Сянкевічам ляжаць ягоныя маці і жонка.

«Прах абаіх год назад прывёз з Сан-Францыска сын Майкл Сянкевіч, — расказвае Скрабатун. — На помніку эпітафія на беларускай мове, так захацеў сын Майкл, які прысутнічаў пры пахаваньні праху свайго бацькі і маці год назад, так і цяпер пры ўстаноўцы помніка. Ён прыбыў з Сан-Францыска з жонкай і старэйшым сынам. З тэкстам эпітафіі на маю просьбу парупіўся Зьміцер Бартосік, які працягвае справу Віктара Сянкевіча на Радыё Свабода».

Віктар Сінкевіч памёр у верасьні 2017 году ў Сан-Францыска на 92-м годзе жыцьця. На радзіме ягоны прах быў пахаваны летась.

Віктар Сянкевіч нарадзіўся на Глыбоччыне, падчас вайны трапіў у Нямеччыну, пасьля ў Францыю, дзе браў удзел у руху Супраціву; пасьля як былы грамадзянін даваеннай Польшчы трапіў у корпус Андэрса, закончыў вайну ў Італіі.

Пасьля вайны, як і шмат хто з былых жаўнераў корпусу Андэрса, Сянкевіч пасяліўся ў Вялікай Брытаніі, адкуль на пачатку 50-х ён паехаў па навуку ў бэльгійскі Лювэн. У 1953 годзе пераехаў у Гішпанію, скончыў там філязофскі факультэт Мадрыдзкага ўнівэрсытэту, абараніў дактарат на тэму гісторыі Вялікага Княства Літоўскага. У 1958-1961 гадох працаваў у беларускай сэкцыі Нацыянальнага гішпанскага радыё.

Язэп Барэйка - візытоўка Свабоды 1970-х
пачакайце

No media source currently available

0:00 0:16:06 0:00
Наўпроставы лінк

Пасьля гэтага паступіў на працу ў тэхнічнай абслузе перадатчыка Радыё Свабода — Радыё Свабодная Эўропа ў мясцовасьці Палямас каля гораду Жыроны ў Каталёніі. З часам ён пачаў дасылаць у Мюнхэн свае перадачы. Сянкевіч пакінуў па сабе таксама немалую творчую спадчыну — сотні скрыптоў на самыя розныя тэмы беларускай гісторыі.

«Гаварыў Язэп Барэйка», — гучала на заканчэньне ягоных перадач у гады халоднай вайны.

Віктар Сянкевіч. Апошняе вядомае фота. Каліфорнія, 1994 год
Віктар Сянкевіч. Апошняе вядомае фота. Каліфорнія, 1994 год

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG