Расейскае агенцтва «РИА Новости» са спасылкай на «вайскова-дыпляматычную крыніцу» у суботу выступіла са сьцьвярджэньнем, што амэрыканскія і брытанскія спэцслужбы «рыхтуюць дэзінфармацыю пра асяродзьдзе прэзыдэнта Расеі Ўладзіміра Пуціна і кіраўніцтва Мінабароны». Гэтую інфармацыю нібыта плянуецца выкарыстаць для абгрунтаваньня новых санкцый супраць Расеі.
Паводле крыніцы агенцтва, спэцыялісты амэрыканскіх і брытанскіх спэцслужбаў «фабрыкуюць фэйкавую інфармацыю пра расейскае кіраўніцтва» падобна так званаму «Панамагейту» — публікацыі матэрыялаў Панамскай юрыдычнай кампаніі Mossack Fonseca ў 2016 годзе.
Крыніца «РИА Новости» сьцьвярджае, што гэтая «фэйкавая інфармацыя» нібыта будзе ўкінутая ў інфармацыйную прастору праз «Праект па расьсьледаваньні карупцыі і арганізаванай злачыннасьці» (OCCRP), структуры фінансістаў Джорджа Сораса і Ўільяма Браўдэра, а таксама праз Радыё Свабода і тэлеканал «Настоящее время». Якіх ні то доказаў сваіх сьцьвярджэньняў яна не прыводзіць. Магчымыя будучыя публікацыі аб асяродзьдзі Пуціна крыніца «РИА Новости» называе ўмяшаньнем ва ўнутраныя справы Расеі.
У сакавіку 2016 году пра падрыхтоўку «заказных» матэрыялаў у замежных СМІ аб асяродзьдзі Пуціна заявіў прэс-сакратар расейскага прэзыдэнта Дзьмітры Пяскоў. Празь некалькі дзён пасьля ягонай заявы былі апублікаваныя «панамскія паперы» аб афшорных кампаніях, у якіх згадваўся шэраг асобаў з атачэньня расейскага прэзыдэнта, у прыватнасьці, віялянчэліст Сяргей Ралдугін. «Засьцярогі» Пяскова журналісты зьвязалі з тым, што перад публікацыяй зьвярталіся ў Крэмль з пытаньнямі і просьбамі аб камэнтары. Няясна, ці зьвязана цяперашняе заява «РИА Новости» з чарговымі журналісцкімі запытамі ў Крэмль.