Лінкі ўнівэрсальнага доступу

У МЗС Беларусі адказалі на рэзалюцыю Рады ААН па правах чалавека


Міністар замежных спраў Беларусі Ўладзімер Макей

У беларускім зьнешнепалітычным ведамстве рэзалюцыю назвалі «беспэрспэктыўнай». Раней Рада ААН па правах чалавека выказала заклапочанасьць станам правоў чалавека ў Беларусі.

МЗС пракамэнтаваў рэзалюцыю Рады ААН па правах чалавека адносна Беларусі, паведамляе БелаПАН.

«Аб беспэрспэктыўнасьці рэзалюцыі, якая была ініцыяваная краінамі-чальцамі ЭЗ, сьведчаць вынікі галасаваньня. Аднак унутраны мэханізм Рады па правах чалавека ўладкаваны так, што, прыняўшы рэзалюцыю аднойчы, яе аўтарам у далейшым складана ад яе адмовіцца. Гэта раўназначна прызнаньню няўдаласьці палітыкі ціску на Беларусь з дапамогай мандата спэцыяльнага дакладчыка, які наша краіна не прызнае, разглядаючы яго як несправядлівую і дыскрымінацыйную меру», — падкрэсьліваецца ў камэнтары.

На думку МЗС, дакумэнт «ня быў падтрыманы большасьцю», паколькі з 47 краінаў-сябраў Рады шэсьць выступілі супраць, а дваццаць адна ўстрымалася.

12 ліпеня Рада па правах чалавека прыняла адносна Беларусі рэзалюцыю, у якой выказала заклапочанасьць станам правоў чалавека.

«Рада выказвае занепакоенасьць становішчам у галіне правоў чалавека і асноўных свабодаў у Беларусі, асабліва неабгрунтаванымі абмежаваньнямі і празьмерна цяжкімі працэсамі, зьвязанымі з ажыцьцяўленьнем правоў на свабоду мірных сходаў, асацыяцыяў і выказваньня меркаваньняў», — гаворыцца ў дакумэнце.

Рада ААН па правах чалавека таксама занепакоеная інфармацыяй пра выпадкі катаваньняў і бесчалавечнага або зьневажальнага абыходжаньня з боку супрацоўнікаў праваахоўных органаў і пэнітэнцыярных устаноў, якія не былі належным чынам расьсьледаваныя ўладамі.

А таксама ўціскам праваабаронцаў, прафсаюзаў і арганізацый грамадзянскай супольнасьці, многім зь якіх адмоўлена ў рэгістрацыі, арыштамі журналістаў і накладаньнем на іх штрафаў за ажыцьцяўленьне імі сваёй дзейнасьці.

Рада заклікае беларускія ўлады «ў поўнай меры выконваць правы на свабоду выказваньня меркаваньняў, мірных сходаў і асацыяцыяў».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG