Такую заяву Аляксандр Лукашэнка зрабіў 9 ліпеня ў Менску на сустрэчы з дзяржаўным сакратаром «саюзнай дзяржавы» Беларусі і Расеі Грыгорыем Рапотам, паведамляе агенцтва БелаПАН.
Лукашэнка выказаўся пра перамовы аб інтэграцыі наступным чынам:
«Ужо было так шмат перамоў, і сёньня ёсьць справаздачы для мяне. Адны абяцаньні. Перамоўная група сутыкнулася зь нейкім пытаньнем — урад Расеі абяцае даць, у тым ліку прэм’ер-міністар Мядзьведзеў, усе каманды, каб вырашыць праблемы ў комплексе. Таму што была вызначаныя тактыка перамоваў: яны абяцалі — забылі, другі раз абяцалі — забылі, гэта значыць, ёсьць незразумелае тармажэньне гэтых працэсаў».
Агенцтва таксама цытуе такія словы кіраўніка Беларусі:
«Заўтра мы сустрэнемся з прэзыдэнтам Пуціным у Санкт-Пецярбургу і абмяркуем вынікі гэтых перамоваў, але абмяркоўваць няма чаго, таму я хацеў бы папрасіць вас узяць пад кантроль і ініцыяваць, паставіць жорсткае пытаньне да расейскага боку, пра тое, што мы павінныя выйсьці літаральна празь некалькі дзён на пэўныя вынікі, каб мы маглі распрацаваць парадак дня і абмеркаваць гэтыя пытаньні з прэзыдэнтам Пуціным 17-18 ліпеня ў Санкт-Пецярбургу. Проста сустрэцца і пасядзець адзін перад адным, ні пра што не гаворачы — напэўна, гэты час ужо сышоў».
