Лінкі ўнівэрсальнага доступу

«Хадзіць часьцей у вышыванцы і гаварыць на роднай беларускай мове», — Макей


Уладзімер Макей

Міністар замежных спраў Уладзімер Макей заявіў, што «кожны з нас павінен узяць на сябе абавязаньні хадзіць часьцей у вышыванцы і гаварыць на роднай беларускай мове».

Уладзімер Макей разам з жонкай і сынамі ў вышыванках сустракаў 5 ліпеня гасьцей сьвята «Ў Беларусі, як дома», якое праводзіла ў Менску Міністэрства замежных спраў для амбасадараў і прадстаўнікоў дыпмісій зь сем’ямі, паведамляе Tut.by.

Удзел у сьвяце бралі кіраўніцтва і супрацоўнікі МЗС, кіраўнікі дыпмісій. Імпрэза суправаджалася паказам калекцый адзеньня, выставамі карцін і фота, выступленьнямі творчых калектываў. Сёлета было каля 200 гасьцей.

«Мы хочам, каб Беларусь была ўтульным домам для тых, хто жыве і працуе тут часова — паслоў, дыпляматаў, — цытуе БелаПАН Уладзімера Макея. — Я спадзяюся, што, прабыўшы нейкі час у нашай краіне, вы запомніце Беларусь як ваш другі дом».

Паводле Макея, сьвята пачыналася як «Дзень вышыванкі». Затым ад амбасадараў, акрэдытаваных у Беларусі, паступіла прапанова, каб кожны прыйшоў на сьвята ў сваім нацыянальным строі і мог прадставіць свае традыцыі, кухню.

На сёньняшняе сьвята амбасадарка Швэцыі ў Беларусі Крысьціна Юханэсан прыйшла ў нацыянальным строі сваёй бабулі, якому 100 гадоў.

«Галоўны прынцып нашай дзяржаўнай палітыкі ў тым, каб у грамадзтве панавалі мір, спакой, талерантнасьць і сяброўства. Мы хочам, каб гэта было перанесена на адносіны з нашымі замежнымі гасьцямі. Каб Беларусь стала для іх другой радзімай», — сказаў кіраўнік МЗС.

Паводле міністра, мультыкультурнасьць павінна не аддаляць, а наадварот, збліжаць дзяржавы, краіны і народы. Адна з мэтаў гэтага мерапрыемства, адзначыў ён, — паказаць, што разнастайнасьць культур — гэта «не перашкода, не праблема, а наадварот, праз разнастайнасьць культур мы павінны імкнуцца стаць як мага бліжэйшымі адзін да аднаго».

«Хочам, каб нашы краіны і народы сябравалі і былі сапраўды блізкімі», — сказаў Уладзімер Макей.

Падчас імпрэзы пасол Расеі Дзьмітрый Мезенцаў падарыў Макею і ягонай жонцы пано з матывамі расейскіх народных казак, а малодшаму сыну Арцёму — плякат з II Эўрапейскіх гульняў з аўтографам расейскага хіп-хоп выканаўцы Цімаці. Канцэрт Цімаці праходзіў у Мінску 29 чэрвеня, напярэдадні закрыцьця Эўрапейскіх гульняў.

Арцём Макей з аўтографам Цімаці
Арцём Макей з аўтографам Цімаці

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG