Прэзыдэнт ЗША Дональд Трамп сустрэнецца з прэзыдэнтам Расеі Ўладзімірам Пуціным пазьней на гэтым тыдні ў японскім горадзе Осака, дзе адбудзецца саміт «Вялікай дваццаткі».
Сустрэча з Пуціным стане адной з сэрыі асабістых сустрэч Трампа з некалькімі замежнымі лідэрамі, паведаміў высокапастаўлены прадстаўнік адміністрацыі ЗША.
Трамп правядзе перамовы, у прыватнасьці, са старшынём КНР, спадчынным прынцам Савудаўскай Арабіі, прэзыдэнтам Турэччыны. Дакладныя даты і час пакуль не паведамляюцца, бо графік Дональда Трампа яшчэ не сфарміраваны канчаткова.
«Адносіны паміж ЗША і Расеяй па ўсіх мерках знаходзяцца ў дрэнным стане, і адміністрацыя праводзіць адносна жорсткую палітыку ў дачыненьні да Расеі, хоць прэзыдэнцкую рыторыку такой назваць нельга», — заявіў агенцтву Associated Press кіраўнік Рады міжнародных адносінаў ЗША Рычард Гаас. Ён дадаў, што для посьпеху сустрэчы ў Осацы «нічога не падрыхтавана».
На мінулым тыдні Пуцін прызнаў, што шкода ад санкцый ЗША і ЭЗ склала каля 50 мільярдаў даляраў з 2014 году. Гэта аслабіла пазыцыі Пуціна і паменшыла яго надзеі на дасягненьне нейкай вялікай зьдзелкі, якая ўмацавала б уплыў Расеі ў сьвеце, адзначае «Голас Амэрыкі».
