Лінкі ўнівэрсальнага доступу

Мінабароны патлумачыла, чаму хоча скараціць адтэрміноўкі на вучобу


Ілюстрацыйнае фота

Міністэрства абароны Беларусі спадзяецца пасьля прыняцьця законапраекту, які скарачае колькасьць адтэрміновак ад войска, «вырашыць цяжкасьці з прызывам».

Прэсавы сакратар Міністэрства абароны Ўладзімер Макараў заявіў Свабодзе, што менавіта абароннае ведамства прапанавала абмежаваць да адной колькасьць дазволеных законам адтэрміновак ад вайсковай службы ў сувязі з вучобай.

«Так, гэта адна з прапаноў Міністэрства абароны, якая прапрацоўвалася сумесна зь іншымі зацікаўленымі ведамствамі. Але падкрэсьлю, што прапанова яшчэ не прынятая, яшчэ абмяркоўваецца».

Што ў законапраекце?

Паводле дэпутаткі Палаты прадстаўнікоў Ганны Канапацкай, Саветам Міністраў у тэрміновым парадку быў унесены праект, разьлічаны на прыняцьце ў двух чытаньнях цягам бягучай сэсіі зьменаў у парадак прызыву на тэрміновую службу.

Законапраект прадугледжвае, што адтэрміноўку ад вайсковай службы будуць даваць толькі адзін раз для тых, хто вучыцца на вочнай форме адукацыі:

  • сярэдняй спэцыяльнай,
  • прафэсійна-тэхнічнай,
  • першай ступені вышэйшай (бакаляўрыят).

Адтэрміноўкі ня будзе для навучаньня ў магістратуры або асьпірантуры (выключэньне — калі на навучаньне накіроўваюць дзяржаўныя органы).

Тым, хто ня пройдзе вайсковую службу без законнай падставы, зьбіраюцца адмаўляць у прыёме на дзяржаўную службу, у органы ўнутраных справаў, фінансавых расьсьледаваньняў і надзвычайных сытуацыяў.

Чым выкліканыя такія прапановы?

Паводле палкоўніка Ўладзімера Макарава, цяпер каля 80% прызыўнікоў маюць права на вызваленьне ці адтэрміноўку ад службы, што спараджае цяжкасьці з прызывам. Гэтая праблема абмяркоўвалася шмат разоў і апошні раз на нарадзе ў Савеце бясьпекі з удзелам Аляксандра Лукашэнкі, якая адбылася ў лютым, нагадаў палкоўнік Уладзімер Макараў. На той нарадзе абмяркоўваліся як прапанова зьнізіць да адной колькасьць адтэрміновак ад службы ў сувязі з вучобай, так і захады дзеля «павышэньня матываванасьці для праходжаньня тэрміновай вайсковай службы і стымуляваньня ўзорнай вайсковай працы».

Уладзімер Макараў, архіўнае фота
Уладзімер Макараў, архіўнае фота

Кіраўнік прэсавай службы Мінабароны сказаў, што частка гэтых прапаноў ужо рэалізаваная. «Прыкладам, з 1 студзеня падвышанае больш як удвая грашовае ўтрыманьне вайскоўцаў тэрміновай службы, ужо прынята рашэньне аб падвышэньні з будучага году ў 15 разоў грашовага ўтрыманьня для вайсковаабавязаных, якіх прызываюць на вайсковыя зборы», — пералічыў зробленыя захады Ўладзімер Макараў.

Палкоўнік Уладзімер Макараў пры гэтым спасылаецца на 57-ы артыкул Канстытуцыі Беларусі, што абарона Беларусі ёсьць «сьвяшчэнным абавязкам грамадзяніна Беларусі».

«Назваў бы гэта пытаньнем сацыяльнай справядлівасьці. Маецца супярэчнасьць паміж дэкляраваным абавязкам і рэальным станам рэчаў, калі значная частка грамадзян ня ўдзельнічае. Зразумела, што ўсе адтэрміноўкі па стане здароўя і па сямейных абставінах будуць захаваныя», — сказаў Уладзімер Макараў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG