Лінкі ўнівэрсальнага доступу

У Казахстане затрымлівалі людзей да гадзіны ночы. Такаеў: гэта неабходна. ФОТА і ВІДЭА


Паліцыя затрымлівае жыхарку Алматы ў цэнтры гораду, 10 чэрвеня

На наступны дзень пасьля прэзыдэнцкіх выбараў у Казахстане працягваліся затрыманьні пратэстоўцаў і выпадковых мінакоў, і яны трывалі да ночы, піша Радыё Азаттык — казаская служба Свабоды.

10 чэрвеня затрыманьні праходзілі ў Нур-Султане, Алматы, Шымкенце і Актобэ. У Алматы паліцыянты перакрылі вуліцы ля цэнтральнай плошчы і затрымлівалі людзей, якія, на іхную думку, маглі б быць удзельнікамі пратэстаў. Многія казалі, што не зьбіраліся пратэставаць.

Адна затрыманая ў Алматы ўжо ў машыне парэзала сабе запясьце
Адна затрыманая ў Алматы ўжо ў машыне парэзала сабе запясьце

«Мяркуючы па ўсім, нярэдка затрымлівалі выпадковых мінакоў, — піша Радыё Азаттык. — Аднаго мужчыну паліцыянты зьнялі проста з ровара: ён хацеў праехаць па ачэпленай сілавікамі тэрыторыі, але трапіў у аўтазак.

Пакуль уладальніка двухколавага транспарту несьлі да паліцэйскага аўтамабіля, ён лаяўся і казаў, што проста ехаў міма. Сьледам у аўтазак закінулі і ягоны транспартны сродак. „Ровар арыштавалі“, — сказаў нехта з прысутных на месцы журналістаў».

Арыштаваных у дзень выбараў, 9 чэрвеня, ужо пачалі судзіць, штрафаваць і садзіць на суткі адміністрацыйнага арышту. Паводле Міністэрства ўнутраных справаў, толькі ў Нур-Султане і Алматы тады затрымалі «каля 500 чалавек».

Колькі было затрымана 10-га, не паведамляецца.

Але ў цэнтры Алматы налічылі ня менш за 100 затрыманых удзень 10-га, яшчэ каля сотні — у ноч на 11 чэрвеня ля гарадзкога дэпартамэнту паліцыі Алматы, дзе пратэстоўцы патрабавалі вызваліць паэта Рыната Заітава.

Ён і рэжысэр Еркін Ракішаў казалі ў выступах, што іхныя зьвесткі пра яўку на выбары і разьмеркаваньне галасоў істотна адрозьніваюцца ад афіцыйных.

Такаеў назваў затрыманьні «неабходнымі», а пра блякаваньне сацсетак «ня ў курсе»

ЦВК Казахстану 10 чэрвеня абвясьціў Касым-Жамарта Такаева пераможцам прэзыдэнцкіх выбараў з 70,76% галасоў. На прэс-канфэрэнцыі ён пахваліў паліцыю і назваў затрыманьні пратэстоўцаў «неабходнымі»: маўляў, некаторыя «паводзілі сябе недастойна, правакавалі супрацоўнікаў паліцыі», бо «карысталіся інфармацыяй звонку, якая падштурхоўвае да незаконных дзеяньняў».

Касым-Жамарт Такаеў
Касым-Жамарт Такаеў

Пры тым Такаеў адзначыў, што «цэлы шэраг грамадзянаў выйшаў на вуліцы, каб выказаць свой пункт гледжаньня, пратэст і гэтак далей», а ў краіне «свабода волевыяўленьня прысутнічае ў поўным аб'ёме».

Ён таксама заявіў, што «быў ня ў курсе» блякаваньня ў сацсетак у дзень выбараў: маўляў, сам актыўна карыстаецца сацсеткамі і вядзе старонку ў Twitter. Такаеў пры тым адзначыў, што «сацыяльныя сеткі ўсё ж не павінны выкарыстоўвацца ў дэструктыўных мэтах, сеяць разлад сярод народу і тым больш правакаваць людзей на сутыкненьні адзін з адным».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG