Лінкі ўнівэрсальнага доступу

«Смутку не патрэбна добраўпарадкаваньне», — Уладзімер Цэсьлер пра Курапаты


Курапаты пасьля добраўпарадкаваньня

Дызайнэр Уладзімер Цэсьлер сказаў Каці Маркоўскай у праекце «Морква», што назву рэстарацыі «Поедем поедим» з гледзішча нэймінгу лічыць удалай.

«Але я там ня быў ніколі», — дадаў Цэсьлер, які вядомы і як аўтар назваў менскага бару «Курилка» і кавярні «Другое место».

Адказваючы на пытаньне пра тое, як павінны выглядаць помнік і мэмарыял у Курапатах, дызайнэр сказаў, што гэта «даволі складаная штука, якая яшчэ толькі павінна быць створаная».

«Калі мы робім добраўпарадкаваньне, то мы гэта робім не для сябе, а для некага — вось прыедуць, пабачаць. А чаму нас павінны турбаваць думкі іншых? Нас павінны турбаваць нашыя думкі. Мы павінна гэта памятаць. А як яно зроблена... Вось тут дакладна — смутку не патрэбна добраўпарадкаваньне».

У лістападзе 2018 году дзяржава ўсталявала ў Курапатах мэмарыяльны знак «Ахвярам палітычных рэпрэсій 30–40-х гадоў XX стагодзьдзя». Яго ўжо некалькі разоў апаганьвалі невядомыя.

Раніцай 24 траўня Аляксандар Лукашэнка «спыніўся» ля Курапатаў падчас праверкі ўпарадкаваньня МКАД і прылеглых тэрыторыяў, піша прэс-служба Лукашэнкі. Лукашэнка загадаў пасадзіць у Курапатах дадатковыя дрэвы.

«І яны, хто там ляжыць (яны нас бачаць), дзякуй скажуць. Па пэрымэтры туі можна. Падумайце, як канчаткова добраўпарадкаваць Курапаты. Некалі мы яшчэ пройдзем, паглядзім», — сказаў Лукашэнка.

Крыжалом у Курапатах. Што важна ведаць

Дэмантаж крыжоў у Курапатах, 4 красавіка
Дэмантаж крыжоў у Курапатах, 4 красавіка

У Курапатах 4 красавіка ​зьнесьлі 70 крыжоў, якія стаялі ўздоўж МКАД і пачалі ўсталёўваць плот. 13 красавіка зьнесьлі ўсе мэталічныя крыжы ўздоўж кальцавой дарогі.​

Ці законна гэта? Суд па крыжах у Курапатах меў адбыцца пасьля 19 красавіка. Прэс-сакратарка кіраўніка Беларусі Натальля Эйсмант патлумачыла працы ў Курапатах распараджэньнем Аляксандра Лукашэнкі.

Як адрэагавалі людзі? Увечары 4 красавіка памаліцца ў Курапаты прыйшлі больш за 200 чалавек. Яны прайшлі крыжовым шляхам да месца, дзе зносілі крыжы. Цягам красавіка за Курапаты моляцца ў розных гарадах і мястэчках Беларусі.

Рэакцыю палітыкаў, грамадзкіх актывістаў і публічных асоб можна пачытаць тут.

Што такое Курапаты?

Курапаты – лясны масіў на поўначы Менску, дзе ў 1937–1941 гадах супрацоўнікі НКВД расстрэльвалі людзей.

Пра масавыя расстрэлы ў Курапатах шырока стала вядома ў 1988 годзе пасьля выхаду артыкула Зянона Пазьняка і Яўгена Шмыгалёва «Курапаты – дарога сьмерці».

Колькі там забілі? Гэта невядома дакладна — архівы НВКД і КГБ не раскрытыя, ды й магчыма, што нават у іх няма поўнага сьпісу расстраляных за час рэпрэсіяў.

Паводле розных падлікаў, карнікі НКВД расстралялі ў Курапатах з 1937 па 1941 гады ад 30 тысяч (першае сьледзтва, што вяла пракуратура БССР) да 250 тысяч чалавек.

Ці не нацысты гэта забівалі? Не, бальшавікі.

Аляксандар Лукашэнка заяўляў у 2015 годзе, нібы яшчэ не вядома дакладна, хто забіваў у Курапатах — бальшавікі ці нацысты. Пасьля выкрыцьця Курапатаў розныя групы спрабавалі знайсьці ў іх «нямецкі сьлед», але раз за разам гэта абвяргалі сьледчыя.

Гэтая публікацыя падрыхтаваная з выкарыстаньнем інфармацыі БелаПАН.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG