Лінкі ўнівэрсальнага доступу

Лукашэнка «спыніўся» ля Курапатаў і забараніў там нешта рабіць без дазволу

абноўлена

Лукашэнка правяраў упарадкаваньне МКАД і спыніўся ў Курапатах

Аляксандар Лукашэнка раніцай 24 траўня «​спыніўся» ля Курапатаў падчас праверкі ўпарадкаваньня МКАД і прылеглых тэрыторыяў, піша прэс-служба Лукашэнкі.

Лукашэнка загадаў пасадзіць у Курапатах дадатковыя дрэвы.

«І яны, хто там ляжыць (яны нас бачаць), дзякуй скажуць. Па пэрымэтры туі можна. Падумайце, як канчаткова добраўпарадкаваць Курапаты. Некалі мы яшчэ пройдзем, паглядзім», — сказаў Лукашэнка.

Лукашэнка забараніў «нешта рабіць» ва ўрочышчы без дазволу.

«Гэта ж палітычная дэманстрацыя. Гэта некаму патрэбна. Можаш прыйсьці, калі ласка, памаліся, пакладзі кветкі і сыходзь, не замінай гэтым людзям», — заявіў Лукашэнка.

Да ўпарадкаваньня тэрыторый ля МКАД Лукашэнка сказаў прыцягнуць дызайнэраў. У цэлым ён запатрабаваў «больш актыўных і прадуманых работ» па азеляненьні тэрыторыі ўздоўж МКАД з асаблівай увагай да разьвязак, адхонаў, пустак. На яго думку, замест «высокіх і непрыгожых» платоў можна «высадзіць дрэвы, напрыклад туі, якія створаць жывую зялёную загарадзь».

Фота і відэа Лукашэнкі ў Курапатах на момант публікацыі няма. Паводле Зьмітра Дашкевіча, Лукашэнкі падчас Курапацкай варты не было.

Крыжалом у Курапатах. Што важна ведаць

Дэмантаж крыжоў у Курапатах, 4 красавіка
Дэмантаж крыжоў у Курапатах, 4 красавіка

У Курапатах 4 красавіка ​зьнесьлі 70 крыжоў, якія стаялі ўздоўж МКАД і пачалі ўсталёўваць плот. 13 красавіка зьнесьлі ўсе мэталічныя крыжы ўздоўж кальцавой дарогі.​

Ці законна гэта? Суд па крыжах у Курапатах меў адбыцца пасьля 19 красавіка. Прэс-сакратарка кіраўніка Беларусі Натальля Эйсмант патлумачыла працы ў Курапатах распараджэньнем Аляксандра Лукашэнкі.

Як адрэагавалі людзі? Увечары 4 красавіка памаліцца ў Курапаты прыйшлі больш за 200 чалавек. Яны прайшлі крыжовым шляхам да месца, дзе зносілі крыжы. Цягам красавіка за Курапаты моляцца ў розных гарадах і мястэчках Беларусі.

Рэакцыю палітыкаў, грамадзкіх актывістаў і публічных асоб можна пачытаць тут.

Што такое Курапаты?

Курапаты – лясны масіў на поўначы Менску, дзе ў 1937–1941 гадах супрацоўнікі НКВД расстрэльвалі людзей.

Пра масавыя расстрэлы ў Курапатах шырока стала вядома ў 1988 годзе пасьля выхаду артыкула Зянона Пазьняка і Яўгена Шмыгалёва «Курапаты – дарога сьмерці».

Колькі там забілі? Гэта невядома дакладна — архівы НВКД і КГБ не раскрытыя, ды й магчыма, што нават у іх няма поўнага сьпісу расстраляных за час рэпрэсіяў.

Паводле розных падлікаў, карнікі НКВД расстралялі ў Курапатах з 1937 па 1941 гады ад 30 тысяч (першае сьледзтва, што вяла пракуратура БССР) да 250 тысяч чалавек.

Ці не нацысты гэта забівалі? Не, бальшавікі.

Аляксандар Лукашэнка заяўляў у 2015 годзе, нібы яшчэ не вядома дакладна, хто забіваў у Курапатах — бальшавікі ці нацысты. Пасьля выкрыцьця Курапатаў розныя групы спрабавалі знайсьці ў іх «нямецкі сьлед», але раз за разам гэта абвяргалі сьледчыя.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG