Пацьвердзілася інфармацыя пра тое, што загад забраць футбольны клюб «Дынама-Менск» у бізнэсоўца Юрыя Чыжа паступіў пасьля паразы ад піцерскага «Зэніту» ў Лізе Эўропы, піша Tut.by.
Эканамічны суд Менску 22 траўня пачаў разглядаць пазоў галоўнага ўпраўленьня спорту і турызму Менгарвыканкама да ЗАТ ФК «Дынама-Менск». Начальнік юрыдычнай службы холдынгу «Трайпл», якому належыць 53% акцый «Дынама», Тацяна Васілеўская распавяла пра пачатак канфлікту.
Высьветлілася, што ў канцы жніўня 2018 году «Трайпл» атрымаў ліст з подпісам тагачаснага мэру Менску Андрэя Шорца з загадам перадаць задарма ва ўласнасьць гораду ўсе акцыі «Дынама». «Трайпл» адказаў, што лічыць справядлівым продаж акцый за 1 мільён даляраў, аргумэнтуючы гэта значнымі ўкладзенымі сродкамі.
Паводле Васілеўскай, на пакупку акцый кампанія патраціла больш 1 мільёну даляраў, на пагашэньне даўгоў — больш 2 мільёнаў даляраў. Кампанія не атрымала адказу ад гарадзкіх уладаў.
У лютым 2019 году «Трайпл» накіраваў усім акцыянэрам «Дынама» пісьмовыя прапановы па продажу акцый. Пасьля чаго кампанія даведалася, што Міністэрства фінансаў наклала забарону на распараджэньне гэтымі акцыямі «у інтарэсах Рэспублікі Беларусь».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў