Лінкі ўнівэрсальнага доступу

На Менскім моры зьявіцца інклюзіўны пляж


Ілюстрацыйнае фота. Першы беларускі інклюзіўны пляж у Лідзе
Ілюстрацыйнае фота. Першы беларускі інклюзіўны пляж у Лідзе

Улетку на Менскім моры зьявіцца першы інклюзіўны пляж. У рамках праекту «ПляжИК» 9-ы пляж Заслаўскага вадасховішча стане даступным для людзей з інваліднасьцю, паведамляе агенцтва «Минск-Новости».

Да ліпеня 2019 году там пракладуць драўляныя дарожкі, паставяць кабінкі для пераадзяваньня з пандусамі; зьявяцца пірс і адкрытая пляцоўка для заняткаў кросфітам. Месца выбралі невыпадкова: на пляжы спадзістая мясцовасьць, зручны ўваход у ваду, а непадалёк — паркоўка.

«Ідэя стварэньня такога месца нарадзілася даўно. Знаходзячыся ў службовых выправах у Расеі, Украіне, я назіраў, наколькі папулярныя інклюзіўныя пляжы там. Зразумеў, што было б ня лішнім арганізаваць падобнае месца і ў нас, бо ні на адным вадаёме Менскага раёну няма інклюзіўнага пляжу», — расказаў аўтар праекту, інструктар актыўнай рэабілітацыі грамадзкага аб’яднаньня «РАІК» Дзяніс Васілевіч.

Паводле яго, пляж будзе карысным для людзей з інваліднасьцю, якія «з прычыны сваіх асаблівасьцяў і адсутнасьці спрыяльных умоваў адмаўляюцца выйсьці з зоны камфорту і цікава правесьці час», а таксама для маці з маленькімі дзецьмі, пажылых людзей, тых, хто нядаўна перажыў інсульт, часова траўмаваных.

«Мы праводзілі аналіз і высьветлілі, што ўлетку зь пятніцы па нядзелю гэта месца наведваюць каля 500 чалавек. Пабываўшы на адаптыўным пляжы і зірнуўшы на банэр, які інфармуе аб праблемах інклюзіі, суайчыньнікі стануць з разуменьнем ставіцца да людзей з інваліднасьцю», — адзначыў Васілевіч.

Таксама на інклюзіўным пляжы будуць праводзіць турыстычныя зьлёты. Людзі, якія страцілі магчымасьці перасоўвацца, змогуць паўдзельнічаць у кулінарных паядынках, пракаціцца на байдарках, SUP-дошках, гідрацыклах, водных цюбінгах, паспаборнічаюць у спартовым арыентаваньні, дартсе і інш. Першы турзьлёт адбудзецца ў сярэдзіне ліпеня.

Праект «ПляжИК» — фінал конкурсу сацыяльных праектаў Social Weekend. Першы ў Беларусі інклюзіўны пляж пачаў працаваць у Лідзе 11 чэрвеня 2017 году.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG