Лінкі ўнівэрсальнага доступу

«Эўравізія» пракамэнтавала гамафобныя намёкі ў эфіры БТ


Транссэксуальная зорка Дана Інтэрнэшнл, падчас выступу якой беларускі камэнтатар зрабіў гамафобныя намёкі

Прэс-служба песеннага конкурсу «Эўравізія» пракамэнтавала​ Свабодзе выказваньні беларускага камэнтатара ў жывым эфіры БТ. Рэмаркі Яўгена Перліна BBC назвала гамафобнымі. Паводзіны беларускага камэнтатара раскрытыкавалі і ў інтэрнэце.

Падчас паўфіналу 14 траўня, калі на сцэне выступала транссэксуальная зорка Дана Інтэрнэшнл, kiss-камэра паказала пацалунак двух мужчынаў. Перлін пракамэнтаваў гэта словамі: «О, Божа! А можа, лепей і не глядзець».

Калі пасьля гэтага камэра перайшла да мужчыны і жанчыны, ён з палёгкай дадаў: «Так, добра ідзем». Але потым камэра зноў выхапіла пацалунак двух мужчын, і Перлін сказаў: «Ды ладна! Спадзяюся, што цяпер апэратары адшукаюць сапраўды клясныя парачкі тут, у Тэль-Авіў Экспа».

Затым Перлін пракамэнтаваў і песьню Бруна Марса Just The Way You Are, якую выконвала Дана Інтэрнэшнл: «Цяпер Дана кажа, што любоў ня мае рэлігіі, ня мае абмежаваньняў, расавых, любых абмежаваньняў. Але ўсё ж такі хочацца, каб каштоўнасьці заставаліся каштоўнымі. Каб каханьне — так? — было каханьнем».

Свабода зьвярнулася да прэс-службы конкурсу з просьбай даць ацэнку словам беларускага камэнтатара. Адказ песеннага конкурсу прыйшоў акурат у Міжнародны дзень барацьбы з гамафобіяй.

«Конкурс песьні Эўравізія сьвяткуе разнастайнасьць і інтэграцыю, і з гэтай мэтай мы не пагаджаемся на любыя непаважлівыя паводзіны ад тых, хто зьвязаны з гэтай цудоўнай падзеяй», — гаворыцца ў адказе прэс-службы.

Там таксама паведамілі, што зь беларускай дэлегацыя была праведзеная тлумачальная гутарка.

«Мы размаўлялі зь беларускай дэлегацыя пра камэнтары падчас іх жывой трансьляцыі першага паўфіналу і нагадалі пра стандарты, якія ад іх чакаюцца». — гаворыцца ў камэнтары прэс-службы конкурсу.

Штогадовы песенны конкурс «Эўравізія» сёлета праходзіць у ізраільскім Тэль-Авіве. Беларусь удзельнічае ў «Эўравізіі» з 2004 году.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG