Расея ўзмоцніць склад войскаў Заходняй і Паўднёвай ваенных акругаў у адказ на разьмяшчэньне сілаў NATO каля расейскіх межаў. Пра гэта заявіў начальнік Генштаба Узброеных сіл, генэрал арміі Валерый Герасімаў на Маскоўскай канфэрэнцыі па міжнароднай бясьпецы.
Для гэтага, як падкрэсьліў Герасімаў, у іх будуць перакінутыя злучэньні са складу іншых ваенных акругаў. Колькасьць узброеных сіл у цэлым застанецца на ўстаноўленым узроўні, адзначыў генэрал.
Пасьля анэксіі Крыма і пачатку канфлікта на ўсходзе Ўкраіны ў 2014 годзе Расея правяла вялікую колькасьць раптоўных вайсковых праверак і вайсковых вучэньняў. Краіны Захаду неаднаразова выказвалі занепакоенасьць імкненьнем Масквы прадэманстраваць сваю ваенную моц на межах краін ЭЗ і NATO.
У NATO таксама занепакоеныя разьмяшчэньнем ля межаў Эўропы ў Калінінградзкай вобласьці расейскіх ракетных комплексаў «Іскандэр». У Маскве заяўляюць, што працягнуць узмацняць сыстэму супрацьпаветранай абароны на заходнім напрамку ў адказ на разгортваньне амэрыканскай ПРА ў Эўропе.
