У Інданэзіі сама меней 92 чальцы выбарчай камісіі памерлі і 374 трапілі ў бальніцу пасьля ўсеагульных выбараў, паведамляе агенцтва Antara. Інданэзійская паліцыя таксама заяўляла пра 15 загінулых супрацоўнікаў.
Прычынай сьмерцяў службоўцаў, чый працоўны дзень доўжыўся больш за суткі, стала зьнямога падчас працэдуры галасаваньня і пры падліку галасоў, адзначыў старшыня Цэнтральнай выбарчай камісіі Інданэзіі Арыф Будыман. Паліцыянты памерлі ад ператомленасьці і зьвязаных зь ёй дарожных аварый.
Выбары 17 красавіка сталі самымі буйнымі ў сьвеце. Акрамя прэзыдэнта, жыхары краіны выбіралі дэпутатаў дзьвюх палат парлямэнту і чальцоў заканадаўчых органаў правінцый і акруг. Па ўсёй краіне было адкрыта больш за 800 тысяч выбарчых участкаў. Яўка дасягнула каля 80% з 192 мільёнаў чалавек, якія маюць права голасу.
Будыман прапанаваў выплаціць сем’ям памерлых і пацярпелых кампэнсацыі, а таксама паабяцаў зьнізіць нагрузку на супрацоўнікаў выбарчых камісій.