Няўрадавая праваабарончая арганізацыя «Рэпартэры бязь межаў» апублікавала штогадовую справаздачу аб парушэньні свабоды слова ў сьвеце.
Сёлета Беларусь заняла 153-ю з 180 пазыцый ва «Сусьветным індэксе свабоды прэсы» і трапіла ў лік краінаў, дзе сытуацыя са свабодай прэсы ацэньваецца як складаная. Летась Беларусь знаходзілася на 155-м месцы.
У справаздачы адзначаецца, што напярэдадні «выбараў» у Беларусі «небясьпечны час для незалежнай журналістыкі», а перасьлед журналістаў, якія працуюць у незалежных СМІ, дасягнуў беспрэцэдэнтнага ўзроўню ў 2018 годзе, калі было накладзена каля 100 штрафаў.
Згадваецца так званая «справа БелТА», падчас якой аб’ектамі перасьледу сталі партал Tut.by і незалежнае навінавае агенцтва БелаПАН, арышты «крытычных журналістаў і блогераў», блякаваньне вядучых навінавых сайтаў і закон «Аб СМІ», які стаў яшчэ больш жорсткім.
«Пазыцыя Беларусі ў Сусьветным індэксе свабоды прэсы 2019 году, падобна, сьведчыць аб паляпшэньні, але на самай справе яна адлюстроўвае той факт, што сытуацыя значна пагоршылася ў многіх іншых краінах, а таксама той факт, што рэкордная колькасьць арыштаў у Беларусі ў 2017 годзе не была паўтораная ў 2018-м», — гаворыцца ў справаздачы.
Першыя тры пазыцыі ў рэйтынгу «Рэпартэраў бязь межаў» занялі:
- Нарвэгія (1-е месца),
- Фінляндыя (2-е),
- Нідэрлянды (3-е).
Найгоршая, паводле дадзеных складальнікаў справаздачы, сытуацыя са свабодай слова ў:
- Туркмэністане (180-е месца),
- Паўночнай Карэі (179-е),
- Эрытрэі (178-е).
Суседзі Беларусі займаюць наступныя месцы ў рэйтынгу:
- Расея —149-е,
- Украіна — 102-е,
- Польшча — 59-е,
- Літва — 30-е,
- Латвія — 24-е.
Самай небясьпечнай краінай для журналістаў за мінулы год прызналі Аўганістан (121-е месца). З 84 прадстаўнікоў СМІ, якія загінулі па ўсім сьвеце ў сувязі са сваёй прафэсійнай дзейнасьцю, там загінулі 16.
Паводле зьвестак праваабаронцаў, «складаная» або «вельмі сур’ёзная» сытуацыя са свабодай слова назіраецца амаль у кожнай другой дзяржаве сьвету. У кожнай трэцяй краіне становішча ацэньваецца як «праблематычнае». Толькі ў 24% выпадкаў нацыянальны ўзровень свабоды прэсы лічыцца «здавальняючым» ці «добрым».
«Рэпартэры бязь межаў» — міжнародная няўрадавая арганізацыя са штаб-кватэрай у Парыжы. Сусьветны рэйтынг свабоды слова арганізацыі штогод складаецца з 2002 году.
