Лінкі ўнівэрсальнага доступу

Паведамленьні пра «мінаваньні» ў дзень выбараў паступалі пераважна з Расеі, — паліцыя Ўкраіны


Нацыянальная паліцыя Ўкраіны заяўляе, што фальшывыя паведамленьні аб мінаваньні ў дзень выбараў прэзыдэнта паступалі пераважна з Расеі.

«Непакоілі сёньня паведамленьні аб мінаваньні, іх было 18. Ільвіная доля — 11 — гэта Днепрапятроўская вобласьць, Чарнігаўская — два, Данецкая — тры, Кіеў — два. Паводле крымінальнай паліцыі Днепрапятроўшчыны, у выпадку ўсіх 11 паведамленьняў быў прасочаны трафік асобаў, якія тэлефанавалі: пераважна яны былі з-за межаў нашай дзяржавы, з Расеі», — сказаў кіраўнік Нацыянальнай паліцыі Сяргей Князеў.

Ён дадаў, што адкрыты тры крымінальныя вытворчасьці па артыкуле «тэракт». Іх перадалі для расьсьледаваньня ў Службу бясьпекі Ўкраіны.

Усяго паводле стану на 20:00 паліцыя атрымала 1927 паведамленьняў аб парушэньнях на выбарах прэзыдэнта, адкрытае 31 крымінальнае вядзеньне і складзена 18 адміністрацыйных пратаколаў у сувязі з парушэньнямі на выбарах.

Ва Ўкраіне 31 сакавіка прайшло галасаваньне на чарговых выбарах прэзыдэнта краіны. Галасаваньне скончылася а 20:00. У бюлетэнь для галасаваньня былі ўнесеныя прозьвішчы 39 кандыдатаў.

Паводле дадзеных Цэнтральнай выбарчай камісіі, яўка на 20:00 склала 63,92%.

Што трэба ведаць пра прэзыдэнцкія выбары ва Ўкраіне

  • Выбары прэзыдэнта Ўкраіны адбыліся ў два туры 31 сакавіка і 21 красавіка 2019 году.
  • Па выніках першага туру найбольш галасоў набралі шоўмэн Уладзімір Зяленскі (за яго прагаласавалі 30,24% выбарнікаў) і дзейны кіраўнік краіны Пятро Парашэнка (15,95%). На трэцім месцы па выніках галасаваньня апынулася Юлія Цімашэнка — 13,40%, далей ідуць Юры Бойка (11,67%) і Анатоль Грыцэнка (6,91%).
  • У другім туры перамог Зяленскі. Паводле папярэдніх вынікаў, ён набраў звыш 73% галасоў, Парашэнка атрымаў каля 24,5%.
  • Прэзыдэнт Украіны выбіраецца на ўсенародных выбарах на пяць гадоў. На гэтую пасаду, як і ў Беларусі, можа прэтэндаваць любы грамадзянін, якому споўнілася 35 гадоў. Заканадаўства абмяжоўвае магчымасьць балятавацца больш чым на два тэрміны.
  • Ва Ўкраіне парлямэнцка-прэзыдэнцкая форма праўленьня. Як вынік, прэзыдэнт мае абмежаваныя паўнамоцтвы: ён прызначае кіраўнікоў сілавых структураў (Службы бясьпекі, Міністэрства абароны, генэральнага пракурора), мясцовых дзяржаўных адміністрацый. Склад ураду і прэмʼер-міністра выбірае парлямэнт, але кандыдатуру на разгляд Вярхоўнай Рады ўносіць прэзыдэнт на падставе прапановы ўрадавай кааліцыі, сфармаванай у Вярхоўнай Радзе пасьля парлямэнцкіх выбараў.
Ілюстрацыйнае фота. Выбары ва Ўкраіне
Ілюстрацыйнае фота. Выбары ва Ўкраіне
  • Прэзыдэнт Украіны не адказвае за эканамічную палітыку, але практычна ўсе кандыдаты ў прэзыдэнты ў часе выбарчай кампаніі маніпулююць выбарнікамі, абяцаючы зьніжэньне тарыфаў, цэнаў, а таксама павелічэньне заробкаў і пэнсій. У той жа час кіраўнік дзяржавы мае права накладваць вэта на законы, ухваленыя парлямэнтам, і пастановы ўраду ў выпадку іх неадпаведнасьці Канстытуцыі.
  • Прэзыдэнт Украіны вызначае замежную палітыку і, адпаведна, прызначае міністра замежных спраў.
  • Адначасова прэзыдэнт Украіны зьяўляецца галоўнакамандуючым Узброеных сілаў і старшынёй Рады нацыянальнай бясьпекі і абароны, склад якой таксама вызначае кіраўнік дзяржавы.
  • Сёлетнія выбары былі найбольш канкурэнтнымі за ўсю гісторыю незалежнасьці Ўкраіны — для рэгістрацыі кандыдатам у Цэнтральную выбарчую камісію зьвярнуліся амаль 90 грамадзян, былі зарэгістраваныя 44 кандыдаты. Гэта найбольшая колькасьць прэтэндэнтаў на пасаду прэзыдэнта за ўсе гады незалежнасьці краіны: у 1999 годзе ў выбарах прэзыдэнта Ўкраіны ўдзельнічалі 13 кандыдатаў, у 2004-м — 24, у 2010-м — 18, у 2014-м — 21.
Ілюстрацыйнае фота
Ілюстрацыйнае фота

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG