Краіны, якія адмовяцца выконваць рэзалюцыю, могуць апынуцца пад міжнароднымі санкцыямі, паведамляе «Голас Амэрыкі».
Рада Бясьпекі ААН 28 сакавіка аднагалосна прыняла першую ў гісторыі рэзалюцыю, якая абавязвае ўсе дзяржавы — чальцы ААН прыняць законы аб барацьбе зь фінансаваньнем тэрарызму.
Цяпер, на думку экспэртаў, амаль 70% дзяржаў, якія ўваходзяць у ААН, ня робяць неабходных захадаў супраць асобаў і кампаній, якія забясьпечваюць тэрарыстам доступ да грошай.
Прынятая рэзалюцыя патрабуе, каб усе дзяржавы прызналі збор сродкаў або фінансавых рэсурсаў для дапамогі тэрарыстычным групоўкам або тэрарыстам-адзіночкам сур’ёзным крымінальным злачынствам. У рэзалюцыі таксама зьмяшчаецца заклік да стварэньня спэцыяльных падразьдзяленьняў для барацьбы з гэтай зьявай у рамках нацыянальных спэцслужбаў.
Супраць дзяржаў, якія адмовяцца выканаць гэтыя патрабаваньні, могуць быць уведзеныя міжнародныя санкцыі.
Кіраўнік Контратэрарыстычнага ўпраўленьня ААН Уладзімір Варанкоў заявіў, што рэзалюцыю прынялі ў «вырашальны момант». Паводле яго, тэрарысты атрымліваюць доступ да грошай з дапамогай як легальных, так і нелегальных каналаў, у тым ліку дзякуючы наркагандлю, продажу будматэрыялаў і патрыманых аўтамабіляў.
У рэзалюцыі ААН маецца заклік да краінаў-удзельніц спыніць выплаты выкупаў выкрадальнікам людзей. Гэтыя злачынствы сталі, у прыватнасьці, асноўнай крыніцай фінансаваньня «Ісламскай дзяржавы» ды іншых тэрарыстычных груповак.