27 сакавіка Лукашэнка адправіў у адстаўку віцэ-прэм’ера Беларусі Міхаіла Русага і міністра сельскай гаспадаркі Леаніда Зайца. Гэта вынікае з кадравых указаў, якія Аляксандар Лукашэнка падпісаў 27 сакавіка, паведамляе БелТА.
Міхаіл Русы займаў пасаду віцэ-прэм’ера і курыраваў пытаньні сельскай гаспадаркі ва ўрадзе з 2012 году. Ён перажыў некалькі абнаўленьняў ураду, працаваў пры ўрадзе Андрэя Кабякова, а пасьля Сяргея Румаса. Пасьля апошняга зьмену складу ўраду ён быў адзіны намесьнік прэм’ера, хто захаваў сваю пасаду.
Леанід Заяц узначальваў Міністэрства сельскай гаспадаркі з 2012 году.
26 сакавіка падчас паездкі па Магілёўскай вобласьці Аляксандар Лукашэнка завітаў у малочны комплекс «Сьліжы» ў Шклоўскім раёне, які ўваходзіць у аргахолдынг «Купалаўскае», абурыўся кепскімі ўмовамі ў кароўніку аграхолдынгу, параўнаўшы іх з Асьвенцімам, і загадаў зьняць з пасадаў «усіх вінаватых». Ён пагражаў прызначэньнем у Шклоўскі раён кіраўніцы сваёй адміністрацыі Натальлі Качанавай, адстаўкай — віцэ-прэм’еру Міхаілу Русаму і свайму памочніку Генадзю Лаўранкову. Казаў: «Гэта недапушчальна, што вы тут целяпаецеся».
Першым сваю пасаду страціў кіраўнік Магілёўскай вобласьці Ўладзімір Даманеўскі.
А гаспадарка праславілася на ўсю краіну. Словы Лукашэнкі пра «Асьвенцім» для кароў расьцягнулі на цытаты дзясяткі сайтаў, яны таксама трапілі ў вечаровыя выпускі навінаў галоўных тэлеканалаў.
Што сказаў Лукашэнка?
- «Не, гэтая карова ледзь жывая, ты паглядзі, як яна рухаецца».
- «Навошта вы сюды мяне прывезьлі? Каб я зараз службе бясьпекі загадаў надзець вам наручнікі?»
- «Калі чалавек не разумее, што гэта Асьвенцім, а вы яго ставіце кіраўніком холдынгу, я вас зусім не разумею».
- «Ты паглядзі на гэтую скаціну, яна ж уся абаср...ная. І на поўсьці ўсё закарэла».
27 сакавіка была заведзеная крымінальная справа па факце злоўжываньня службовымі паўнамоцтвамі на кіраўніцтва ААТ «Амкадор-Шклоў» і ТАА «Купалаўскае».
