Лінкі ўнівэрсальнага доступу

Пазьняк абвяргае словы Алексіевіч пра стаўленьне да хворых дзяцей


Зянон Пазьняк

Сама Нобэлеўскакя ляўрэатка тлумачыць, што пазыцыю Пазьняка ёй пераказалі заходнія журналісты.

Нобэлеўская ляўрэатка Сьвятлана Алексіевіч перад пасяджэньнем свайго інтэлектуальнага клюбу ў Менску 26 сакавіка, прысьвечаным тэме кампрамісу, сярод іншага, выказалася пра кіраўніка Кансэрватыўна-хрысьціянскай партыі БНФ Зянона Пазьняка.

«Я адразу прыгадала свой дыялёг з Пазьняком, які недзе гадоў 15 таму казаў, што ў гэтую краіну трэба... ніводнай таблеткі, нічога, нягледзячы на тое, што там дзеці хворыя. Такім чынам дыктатура хутчэй рухне. Калі мяне спыталі, я сказала, што ў мяне іншае меркаваньне. Калі вось гэтыя лекі, якія там немцы, швэды зьбяруць, і калі вы ўратуеце аднаго, двух дзяцей, дык для мяне гэта важней».

Зянон Пазьняк пракамэнтаваў для Радыё Свабода гэтую цытату.

«Я з Алексіевіч незнаёмы асабіста і ніколі ў жыцьці зь ёй не размаўляў. Тое, што яна гаворыць, гэта Лукашэнка нумар 2 — сказаць рэч, якую ніхто ня можа праверыць. Але гэта хлусьня.

Па другое, [Беларускі Народны] Фронт і я асабіста былі ініцыятарамі стварэньня некалькіх арганізацый, у тым ліку "Дзеці Чарнобылю", якія выратавалі тысячы людзей, тысячы дзяцей. Развозілі лякарствы, вазілі дзяцей за мяжу. Арганізацыя "Дзеці Чарнобылю" потым дзейнічала самастойна, адна дзейнічала ў Фронце, дзейнічала ў Магілёве. Фронт праводзіў велізарную работу па выратаваньню чарнобыльцаў, ня кажучы ўжо пра заканадаўчую».

Сьвятлана Алексіевіч на пасяджэньні свайго інтэлектуальнага клюбу 26 сакавіка 2019
Сьвятлана Алексіевіч на пасяджэньні свайго інтэлектуальнага клюбу 26 сакавіка 2019

У гутарцы з карэспандэнтам Свабоды Сьвятлана Алексіевіч патлумачыла сваё выказваньне на паседжаньні інтэлектуальнага клюбу.

«Гэта быў не дыялёг, а проста ў яго была такая пазыцыя, пра якую мне казалі заходнія журналісты. "Вось вы агітуеце, каб мы дапамагалі, а ў той жа час ваш Зянон Пазьняк, які цяпер за мяжой, лічыць, што такім чынам мы дапамагаем дыктатуры". А я сказала, што ў мяне іншы погляд. Што я паезьдзіла па чарнобыльскіх вёсках, дзе не было нават бінтоў і асьпірыну, і я прашу вас, калі магчыма, дапамагайце, бо мы дапамагаем дзецям.

А наконт таго, што ён незнаёмы са мной — мы нават некалі вылучаліся па адной акрузе, размаўлялі, пакуль ён ня зьехаў і ня стаў са мной нязгодны».

Зянон Пазьняк таксама пракамэнтаваў сытуацыю з гуманітарнай дапамогай для Беларусі.

«Чалавек не арыентуецца ў справе. Рэжым даўно ўжо — гадоў 15 таму — спыніў усякую гуманітарную дапамогу. Гуманітарная дапамога вымушаная была згарнуцца, таму што ўлады наклалі лапу і абавязвалі, каб усё ішло празь дзяржаўныя структуры, праз чыноўнікаў, якія будуць красьці і разьмяркоўваць. Дапамогу спыніў Лукашэнка, рэжым спыніў».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG