Лінкі ўнівэрсальнага доступу

ААН прызнала захопленых ўкраінскіх маракоў ваеннапалоннымі


Украінскія маракі, захопленыя расейскімі памежнікамі каля берагоў анэксаванага Крыму, могуць лічыцца ваеннапалоннымі. Пра гэта гаворыцца ў дакладзе Упраўленьня вярхоўнага камісара ААН па правах чалавека.

У ААН заявілі, што затрыманыя маракі трапляюць пад дзеяньне Жэнэўскай канвэнцыі. Яны будуць знаходзіцца ў статусе ваеннапалонных да таго часу, пакуль кампэтэнтны суд не прыме іншага рашэньня.

25 лістапада мінулага году каля берагоў анэксаванага Крыму расейскія памежнікі захапілі тры ўкраінскія вайсковыя караблі. Былі затрыманыя 24 маракі, якіх абвінавачваюць у незаконным перасячэньні мяжы Расеі.

Кіеў назваў гэтае здарэньне агрэсіі, а маракоў — ваеннапалоннымі. Расейскія ўлады заявілі, што ўкраінскія вайскоўцы пайшлі на сьвядомую правакацыю. Паводле расейскіх уладаў, маракі ня могуць быць ваеннапалоннымі, бо няма вайны паміж Расеяй і Ўкраінай.

У студзені Парлямэнцкая асамблея Рады Эўропы прыняла рэзалюцыю, дзе асудзіла дзеяньні Расеі і запатрабавала вызваліць маракоў. Пры гэтым у тэксьце дакумэнту ПАРЭ не выкарыстоўвала тэрмін «ваеннапалонныя». Пры гэтым Эўразьвяз увёў супраць Расеі санкцыі за агрэсію ў Керчанскім праліве.

Канвэнцыя аб абыходжаньні з ваеннапалоннымі прынятая 12 жніўня 1949 году ў Жэнэве. Яна зьяўляецца часткай міжнароднага гуманітарнага права і рэглямэнтуе вядзеньне ўзброеных канфліктаў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG