Лінкі ўнівэрсальнага доступу

7 адрозьненьняў паміж выбарамі ў Паўночнай Карэі і Беларусі

абноўлена

Выбары ў Паўночнай Карэі

У Паўночнай Карэі сёньня фармальна маюць выбраць 687 дэпутатаў карэйскага парлямэнту — Вярхоўнага народнага сходу 14-га скліканьня. Гэта другія выбары найвышэйшага прадстаўнічага органу ўлады падчас кіраваньня Кім Чэн Ына.

Мы сабралі адрозьненьні і падабенствы паміж выбарамі ў Паўночнай Карэі і Беларусі.

1. Парлямэнт у Паўночнай Карэі, як і ў Беларусі, мае фасадны, дэкаратыўны характар. Фармальна, паводле закону, ён можа пісаць законы і зьмяняць Канстытуцыю, на справе ж усе асноўныя рашэньні прымаюцца цэнтральным партыйным апаратам, а ў Беларусі — Адміністрацыяй прэзыдэнта.​

2. У Паўночнай Карэі галасаваньне зьяўляецца абавязковым. Улады ставяцца да выбараў як да перапісу, і правяраюць, ці ня зьбег нехта з краіны. У Беларусі галасаваньне неабавязковае, але студэнтаў і супрацоўнікаў дзяржаўнага сэктару прымусова зганяюць галасаваць.

3. У Паўночнай Карэі заўжды чэргі перад выбарчымі ўчасткамі. Мяркуецца, што яўка на выбарах сёньня складзе ня менш за яўку ў 2014 годзе, калі "прагаласавалі" 99,7% паўночнакарэйцаў. Яўка на выбарах 2015 году ў Беларусі склала 86,75%, але чэргаў на ўчасткі амаль ніколі не назіраецца.

4. На бюлетэнях у Паўночнай Карэі можна нічога не пазначаць. Выбары безальтэрнатыўныя: у бюлетэні імя толькі аднаго кандыдата, прызначанага зьверху, таму дастаткова ўзяць бюлетэнь і кінуць яго ў скрыню, каб голас быў залічаны. У Беларусі трэба пазначаць, за каго галасуеш, хаця выбары па бальшыні акругаў у сельскія саветы таксама безальтэрнатыўныя.

5. Кандыдатаў у Карэі прызначае Партыя. Партыя Кім Чэн Ына, напрыклад, у цяперашні час займае 607 месцаў у Вярхоўным народным сходзе (з 687 кандыдатаў). Рэшта фармальна належыць да іншых партыяў, якія, праўда, знаходзяцца ў кааліцыі з кіроўнай Партыяй Працы. У выніку апошніх выбараў у Беларусі ў Палату прадстаўнікоў трапілі два непраўладныя кандыдаты — Алена Анісім і Ганна Канапацкая.

6. Пасьля галасаваньня паўночнакарэйцы ідуць сьвяткаваць. Падобна, як і ў Беларусі, арганізаваныя буфэты, сьвяточныя кірмашы, музыка ў горадзе. Для людзей, якія стаяць у чарзе, каб «прагаласаваць», выступаюць мясцовыя танцавальныя і сьпеўныя калектывы.

7. Кім Чэн Ын, як і Аляксандар Лукашэнка, не сумняецца ў народнай падтрымцы. На мінулых выбарах на ўчастку Кім Чэн Ына прагаласавалі 100% выбарнікаў, і 100% галасоў было аддадзена за Кім чэн Ына. Лукашэнка, паводле афіцыйных дадзеных, набраў на прэзыдэнцкіх выбарах 83,49%. Паводле ж дадзеных НІСЭПД, Лукашэнка набраў толькі 50,8%.


А як вы думаеце, колькі б набраў Кім Чэн Ын, калі б выбары былі дэмакратычныя? Пішыце ў камэнтарах.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG