Лінкі ўнівэрсальнага доступу

Са 118 раёнаў Беларусі жанчыны кіруюць толькі чатырма. Усе яны — у адной вобласьці


Свабода падлічыла, колькі жанчын працуюць у Беларусі на высокіх пасадах, вызначыла іх прадстаўніцтва ва ўладных структурах.

Урад — адна міністарка

Ірына Касьцевіч
Ірына Касьцевіч

Ва ўрадзе — прэм’ер, 5 ягоных намесьнікаў (1 зь якіх у статусе першага), 24 міністры, 7 старшынь дзяржаўных камітэтаў і 7 кіраўнікоў дзяржаўных арганізацыяў, якія падначаленыя Саўміну.

Сярод 44 кіраўнікоў толькі адна жанчына — міністарка працы і сацыяльнай абароны Ірына Касьцевіч. Гэта ўсяго 2,3% ад агульнага ліку.

Савет Рэспублікі — 17 жанчын

Мар'яна Шчоткіна
Мар'яна Шчоткіна

Нацыянальны сход Беларусі складаецца зь дзьвюх палат: верхняй (Савет Рэспублікі) і ніжняй (Палата прадстаўнікоў).

Цяпер у Савеце Рэспублікі 57 чалавек. Сярод іх 17 жанчын.

Ала Бодак
Ала Бодак

​Гэта каля 30% ад агульнай колькасьці «сэнатараў».​ Мар’яна Шчоткіна — намесьніца кіраўніка палаты.

Адну зь пяці камісіяў (па заканадаўстве і дзяржаўным будаўніцтве) ачольвае Ала Бодак.

Палата прадстаўнікоў — 38 жанчын

У ніжняю палату ўваходзяць 110 дэпутатаў. Жанчын сярод іх — 38. Гэта каля 35% ад агульнай колькасьці дэпутатаў.

З 14 парлямэнцкіх камісіяў жанчыны ачольваюць 5.

Натальля Карповіч
Натальля Карповіч

Канстытуцыйны суд — 4 жанчыны

У дзейным складзе Канстытуцыйнага суду 11 юрыстаў.

Сярод іх 4 жанчыны, у тым ліку Натальля Карповіч — намесьніца старшыні. Гэта крыху болей за 36%.

Жанна Шкурдзюк
Жанна Шкурдзюк

Вярхоўны суд — 32 жанчыны

У старшыні Вярхоўнага суду 5 намесьнікаў, зь якіх адна жанчына — Жанна Шкурдзюк.

Усяго ў краіне 78 чалавек, якія маюць статус судзьдзі Вярхоўнага суду.

Жанчын зь іх — 32. Гэта 41% ад агульнага сьпісу судзьдзяў.

Аблвыканкамы і Менскі гарвыканкам — без жанчын

Сярод кіраўнікоў шасьці аблвыканкамаў і сталічнага гарвыканкаму жанчын няма.

Райвыканкамы — 4 жанчыны

У Беларусі 118 раёнаў. Цяпер у кіраўніцтве раёнаў ёсьць дзьве вакансіі. Астатнія месцы разьмяркоўваюцца так: 112 мужчын і 4 жанчыны. На долю жанчын прыпадае ўсяго 3,5% старшынстваў.

Цяжка зразумець, чаму, але ўсе чатыры жанчыны ачольваюць раёны адной і той жа вобласьці — Гомельскай. На чале Гомельскага раёну стаіць Алена Алексіна, Добрускага — Вольга Мохарава, Лоеўскага — Вераніка Байкова, Мазырскага — Алена Паўлечка.

Амбасады — 1 жанчына

Алена Купчына
Алена Купчына

Раней Свабода пісала, што ў Беларусі цяпер 7 замежных амбасадарак. У той жа час Беларусь прадстаўленая за сваімі межамі толькі адной амбасадаркай — Аленай Купчыной.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG