Арганізатар «Эўравізіі», Эўрапейскі вяшчальны зьвяз, пракамэнтаваў рашэньне аб адмове Ўкраіны ад удзелу ў песенным конкурсе, які прымае Тэль-Авіў.
«З сумам можам пацьвердзіць, што ўкраінская тэлерадыёкампанія „UA:Перший“ праінфармавала нас, што пасьля абмеркаваньняў яны прынялі цяжкае рашэньне выйсьці зь песеннага конкурсу „Эўравізія-2019“. Будуць працягвацца дыскусіі паміж зьвязам і „UA:Перший“ з гэтай нагоды, але мы спадзяёмся ўбачыць іх зноў у 2020 годзе», — гаворыцца ў паведамленьні.
Нацыянальная грамадзкая тэлерадыёкампанія (НСТУ) і пераможца нацыянальнага адбору Maruv адмовіліся падпісваць кантракт аб удзеле ў «Эўравізіі». У адрас сьпявачкі гучала крытыка за тое, што раней яна езьдзіла выступаць у Расею і таксама заплянавала канцэрты там у будучыні.
Пасьля гэтага НСТУ пачала перамовы зь іншымі ўдзельнікамі адбору. Freedom Jazz і Kazka адмовіліся прадстаўляць Украіну на конкурсе.
28 лютага ў НСТУ заявілі, што адмаўляюцца ад удзелу ў Міжнародным песенным конкурсе «Эўравізія-2019».
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў