22 лютага за хабар затрымалі галоўнага спэцыяліста ўпраўленьня архітэктуры і горадабудаўніцтва Магілёўскага гарвыканкаму, піша Міністэрства ўнутраных спраў.
Чыноўнік абвінавачваецца ў атрыманьні хабараў за «легалізацыю» абʼектаў самавольнага будаваньня. Заведзена крымінальная справа паводле артыкулу 430 «атрыманьне хабару», абставіны злачынства высьвятляюцца.
Паводле МУС Беларусі ў лістападзе і сьнежні 2018 году 63-гадовы затрыманы незаконна выдаў індывідуальным прадпрымальнікам заключэньні аб прыняцьці ў эксплюатацыю самавольных будынкаў — памяшканьня СТА і вытворча-складзкога будынку. Агулам за гэта ён атрымаў хабары памерам 1400 даляраў, паводле ГУБАЗіК МУС.
Вядома, што «кліентаў» для чыноўніка знаходзіла яго 33-гадовая знаёмая — камэрцыйны дырэктар фірмы ў сфэры не рухомасьці, былы супрацоўнік агенцыі па дзяржаўнай рэгістрацыі і зямельнаму кадастру. За свае паслугі яна атрымоўвала частку ўзнагароджаньня. Жанчыну затрымалі раней за падбухторваньне бізнэсоўцаў да даваньня хабару, таксама супраць яе завялі крымінальную справу за махлярства.