Прэзыдэнт ЗША Дональд Трамп заявіў пра рашэньне адкласьці павышэньне мытных тарыфаў на кітайскія тавары, якое павінна было набыць сілу 1 сакавіка. Сваё рашэньне Трамп патлумачыў «вельмі прадуктыўнымі перамовамі» з Кітаем.
Паводле Трампа, «пры ўмове дадатковага прагрэсу» на перамовах на ягонай віле ў Флорыдзе можа быць заплянаваная яго сустрэча з кіраўніком КНР Сі Цзіньпінам для заключэньня гандлёвага пагадненьня. Калі можа адбыцца сустрэча, Трамп не ўдакладніў.
22 лістапада прэзыдэнт ЗША прыняў у Белым доме віцэ-прэм’ера Дзяржсавета КНР Лю Хэ і заявіў пра «добрыя шанцы заключыць пагадненьне».
ЗША зьбіраліся са студзеня 2019 году павысіць тарыфы на імпарт тавараў з Кітаю з 10 да 25 працэнтаў. Аднак у сьнежні на саміце Вялікай дваццаткі ў Аргентыне Дональд Трамп і Сі Цзіньпін дамовіліся адкласьці павышэньне мытаў на 90 дзён.
У канцы студзеня ў Вашынгтоне адбыўся чарговы раўнд гандлёвых перамоваў. Тады Трамп заявіў, што спадзяецца на падпісаньне пагадненьня да 1 сакавіка. Калі дамова ня будзе падпісаная, то Вашынгтон увядзе павышаныя мыты на кітайскія тавары на суму ў 200 мільярдаў даляраў.
