Лінкі ўнівэрсальнага доступу

У Берасьці 240 праціўнікаў акумулятарнага заводу выйшлі на плошчу Леніна


Мітынг супраць пабудовы акумулятарнага заводу, архіўнае фота
Мітынг супраць пабудовы акумулятарнага заводу, архіўнае фота

Падтрымаць пратэстоўцаў у Берасьце 17 лютага прыехалі зь Менску палітыкі Віталь Рымашэўскі, Юры Губарэвіч і Мікалай Казлоў.

Сустаршыня аргкамітэта па стварэньні партыі «Беларуская хрысьціянская дэмакратыя» Віталь Рымашэўскі распавёў, што яны ведаюць аб затрыманьні напярэдадні ў Берасьці праваабаронцы Уладзімера Вялічкіна і актывіста Віталя Казака. Таму і прыехалі сюды, каб падтрымаць жыхароў горада, якія пратэстуюць супраць будаўніцтва небясьпечнага завода, паведамляе БелаПАН.

«Тое, што зрабілі берасьцейцы, абараняючы гэты кавалачак свабоды — гэта вельмі важна. Улады павінны бачыць, што людзі супраць гэтага міні-Чарнобыля, які будуюць пад Берасьцем».

Палітык кажа, што ўлады Берасьця «павінны пачуць людзей». Ён нагадаў пра аналягічныя экалягічна небясьпечныя прадпрыемствы ў Сьветлагорску, Магілёве, Гомлі, супраць якіх таксама пратэстуюць мясцовыя жыхары. «Нам трэба спыніць гэта дзеля будучыні нашай краіны», — заявіў Рымашэўскі.

Удзельнікі сустрэчы на плошчы Леніна паведамілі, што сёньня а 7.30 у Бярозе на чыгуначным вакзале быў затрыманы блогер Аляксандар Кабанаў. Яго даставілі ў мясцовы РАУС, дзе на працягу трох гадзін апытвалі з нагоды пратэсту 10 лютага. Людзі лічаць, што Кабанава адмыслова затрымалі, каб ён ня змог прыехаць у Берасьце на традыцыйную нядзельную сустрэчу.

Пратэстоўцы таксама выказвалі абурэньне затрыманьнем Вялічкіна і Казака, якіх зьмясьцілі ў ізалятар часовага ўтрыманьня і будуць судзіць.

Падобныя пратэсты адбываюцца ў Берасьці кожную нядзелю, пачынаючы з 25 лютага 2018 года. Людзі зьбіраюцца на плошчы Леніна і кормяць галубоў.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG