Лінкі ўнівэрсальнага доступу

Памёр акадэмік Міхаіл Касьцюк — адзіны дырэктар Інстытуту гісторыі, якога выбіралі


Міхаіл Касьцюк

Пад яго кіраўніцтвам інстытут даў заключэньне, якое дапамагло бел-чырвона-беламу сьцягу і гербу «Пагоня» стаць дзяржаўнымі сымбалямі.

Гісторык Міхаіл Касьцюк нарадзіўся 26 сакавіка 1940 у вёсцы Масьцішча на Наваградчыне. Скончыў Горадзенскі дзяржаўны пэдагагічны інстытут імя Янкі Купалы. Працаваў у Інстытуце гісторыі Акадэміі навук, а ў 1988–1999 гг. быў ягоным дырэктарам.

Паводле калегі Міхаіла Касьцюка доктара гістарычных навук Валянціна Голубева, ён адыграў важную ролю ў прызнаньні бел-чырвона-белага сьцяга і герба «Пагоня» дзяржаўнымі сымбалямі.

«Ён быў дырэктарам Інстытуту гісторыі ў складаны пэрыяд, гэта быў першы і адзіны дырэктар, якога не прызначалі, а выбіралі калектывам інстытуту. Тады ў конкурсе на пасаду бралі ўдзел некалькі чалавек. Ён узначаліў інстытут, калі вырашалася пытаньне нацыянальнай сымболікі ў Вярхоўным Савеце. І інстытут даваў такія заключэньні, якія дапамаглі дэпутатам прыняць рашэньне, каб гэтыя сымбалі сталі дзяржаўнымі».

Таксама пры яго кіраўніцтве інстытутам выйшаў двухтомнік «Нарысы гісторыі Беларусі», якія разглядаў гісторыю і гістарыяграфію Беларусі з нацыянальнага пункту гледжаньня. Па гэтых падручніках вучыліся не адзін год студэнты гістарычных факультэтаў.

Міхаіл Касьцюк — аўтар звыш 250 навуковых прац, 10 манаграфій. У 2010 годзе ён быў узнагароджаны ордэнам імя Францішка Скарыны. Пасьля сыходу Міхаіла Касьцюка ў Беларусі не засталося гісторыкаў-акадэмікаў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG