Дзевяць японскіх кампаній атрымалі па пошце лісты зь белым парашком, які, як мяркуецца, можа ўтрымліваць цыянід, паведамляе Japan Today і іншыя мясцовыя СМІ.
Канвэрты былі адпраўленыя ў сем фармацэўтычных кампаній у Токіё і Асацы, адну харчовую фірму на востраве Хакайда, а таксама выдавецтва газэты Mainichi Shimbun.
Лісты былі адпраўленыя ад імя пакараных сьмерцю за арганізацыю тэракту ў Токіё лідэраў японскай сэкты «Аум Сінрыкё», у тым ліку ад імя яе заснавальніка Сёку Асахару, які абвясьціў сябе рэінкарнацыяй адначасова Хрыста, Буды і Шывы. Сэкта забароненая ў Беларусі і палове сьвету.
Аўтары лістоў патрабуюць да 22 лютага выплаціць ім 35 мільёнаў паўднёвакарэйскіх вон у біткойнах, інакш яны пагражаюць распаўсюдзіць падробленыя мэдыкамэнты, якія зьмяшчаюць цыянід.
Падобныя лісты ўжо рассылаліся па японскіх фармакалягічных кампаніях у мінулым годзе. Паліцыя пачала расьсьледаваньне інцыдэнту.