У Мурманскай вобласьці пры пасадцы на вайсковы аэрадром у Аленягорску разьбіўся расейскі бамбавік Ту-22 М3.
Агенцтва ТАСС перадае, што з чатырох чалавек, якія знаходзіліся на борце, выжылі двое — камандзір і штурман. Падобную інфармацыю перадае і «Інтэрфакс» са спасылкай на Міністэрства абароны Расеі.
У міністэрстве заяўляюць, што самалёт разьбіўся пасьля таго, як крануўся ўзьлётнай паласы. Бамбавік зьдзяйсьняў вучэбна-трэніровачны палёт без боекамплекту.
На месцы крушэньня ўзьнікла ўзгараньне, яго тушаць вайскоўцы і пажарнікі, перадаюць расейскія агенцтвы.
Звышгукавыя бамбавікі Ту-22 мадыфікацыі М3 эксплюатуюцца з канца 70-х гадоў. Апошнія экзэмпляры пабудавалі ў пачатку 90-х гадоў пасьля распаду СССР. Міністэрства абароны Расіі заяўляла аб плянах мадэрнізаваць некалькі дзесяткаў такіх самалётаў.