97-гадовы прынц Філіп, муж каралевы Вялікабрытаніі Лізаветы II, атрымаў папярэджаньне з паліцыі за тое, што не прышпіліў пас бясьпекі пры язьдзе аўтамабілем — праз два дні пасьля аварыі зь ягоным удзелам.
Правапарушэньне, дапушчанае манархам, зафіксавалі дарожныя відэакамэры, піша ў нядзелю, 20 студзеня, навінавае агенцтва Reuters.
У гэты дзень газэты апублікавалі фатаздымак «непрышпіленага» прынца за стырном выдадзенага на зьмену аўтамабіля мадэлі Land Rover у каралеўскай рэзыдэнцыі Сандрынгем, графства Норфалк.
«Мы ведаем пра фатаздымкі. Кіроўцу былі дадзеныя адпаведныя рэкамэндацыі, што зьяўляецца нашай звычайнай рэакцыяй пры атрыманьні інфармацыі пра такога роду парушэньні», — цытуе выданьне камэнтар прадстаўніка паліцыі.
У мінулы чацьвер ягоная машына трапіла ў дарожна-транспартнае здарэньне, сутыкнуўшыся зь іншым транспартным сродкам, аднак прынц не пацярпеў. Яго кіроўца, жанчына 28 гадоў, атрымала лёгкія траўмы, а кіроўца аўтамабіля Kia, зь якім сутыкнуўся аўтамабіль прынца — 45-гадовая жанчына з васьмімесячным немаўляткам — зламала запясьце і зьвярнулася па дапамогу ў шпіталь.
У траўні 2017 году стала вядома, што прынц Філіп больш не бярэ ўдзел у публічных падзеях — у сувязі з узростам.