На наступны дзень пасьля сустрэчы з прэзыдэнтам Турэччыны сэнатар ЗША Ліндсі Грэм выказаў спадзяваньне, што прэзыдэнт ЗША Дональд Трамп адкладзе рашэньне аб вывадзе войскаў з Сырыі, пакуль «Ісламская дзяржава» ня будзе ліквідавана.
Сэнатар-рэспубліканец Грэм сказаў у суботу ў Анкары:
«Мэта — зьнішчэньне „Ісламская дзяржава“ яшчэ не дасягнутая».
Ён заявіў, што сыход ЗША з Сырыі бяз пэўнага пляна прывядзе да хаосу, які будзе нагадваць, як ён выказаўся, «гіпэртрафаваны Ірак», паведамляе паведамляе «Голас Амэрыкі».
Сустрэча ў пятніцу ў Анкары прэзыдэнта Турэччыны Раджэпа Эрдагана і сэнатара ЗША Ліндсі Грэма стала яшчэ адной спробай разрадзіць амэрыкана-турэцкую палітычную напружанасьць вакол Сырыі.
19 сьнежня прэзыдэнт ЗША абвясьціў аб вывадзе амэрыканскіх вайскоўцаў з Сырыі на працягу бліжэйшых двух месяцаў. Трамп тады сказаў, што амэрыканскія салдаты дамагліся перамогі над тэрарыстычнай групоўкай «Ісламская дзяржава».
Гэты крок выклікаў крытыку як з боку саюзьнікаў ЗША, так і ў Кангрэсе. Міністар абароны Джэймс Мэтыс падаў у адстаўку.
Паводле дадзеных CNN, Трамп зьмяніў пазыцыю ў пытаньні вываду войскаў пасьля візыту на амэрыканскую вайсковую базу ў Іраку ў сьнежні мінулага года. Военачальнікі пераканалі прэзыдэнта ў тым, што джыгадысты да канца не пераможаныя.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў