Міністэрства замежных справаў Вэнэсуэлы лічыць, што ўрады 11 лацінаамэрыканскіх краін па ўказаньні ЗША спрабуюць дэстабілізаваць палітычную сытуацыю ў Баліварыянскай Рэспубліцы з мэтай адхіленьня ад улады прэзыдэнта Нікаляса Мадура. Пра гэта гаворыцца ў заяве ведамства, якое разьмясьціў у сетцы Twitter яго кіраўнік Хорхе Арэаса.
«Баліварыянскі ўрад Вэнэсуэлы асуджае ціск групы ўрадаў-сатэлітаў, падпарадкаваных ЗША, з мэтай дэстабілізаваць сытуацыю і выкарыстоўваць яе супраць законна абраных дэмакратычных інстытутаў краіны», — адзначае МЗС.
На яго думку, кіраўніцтва Аргентыны, Бразыліі, Канады, Чылі, Калюмбіі, Коста-Рыкі, Гватэмалы, Гандурасу, Панамы, Парагваю і Перу «незаконна прымаюць на сябе паўнамоцтвы вызначаць легітымнасьць вэнэсуэльскай улады». «Вышэйназваныя ўрады аддаюць свае галасы, каб справакаваць сытуацыі ўнутрыпалітычнай нестабільнасьці, апраўдаць замежнае ўмяшаньне, да якога імкнуцца ЗША безь якіх-небудзь абгрунтаваньняў», — гаворыцца ў заяве.
Ведамства заключае, што ўлады краіны «дэталёва прааналізуюць гэткія варожыя дзеяньні і будуць прымаць рашэньні, якія гарантуюць абарону дзяржавы, яе інстытутаў і нацыянальнага сувэрэнітэту».
У мінулы чацьвер пераможца прэзыдэнцкіх выбараў у Вэнэсуэле Нікаляс Мадура ўступіў на пасаду кіраўніка дзяржавы: ён прынёс прысягу ў Вярхоўным судзе, а не ў Нацыянальнай асамблеі. Выбары прэзыдэнта Вэнэсуэлы адбыліся 20 траўня 2018 году.
ЗША лічаць інаўгурацыю Нікаляса Мадура «ўзурпацыяй улады» і будуць працягваць ўводзіць санкцыі супраць вэнэсуэльскіх урадоўцаў і іх сем’яў, замяшаных, паводле Вашынгтону, у парушэньнях правоў чалавека, карупцыі і падрыве дэмакратыі. Пра гэта сказаў у мінулы чацьвер, 10 студзеня, дзяржаўны сакратар ЗША Майкл Пампэо.
Гэтую пазыцыю падзяляюць і ў Эўразьвязе. «Мы вельмі ясна заявілі: прэзыдэнцкія выбары не былі ні свабоднымі, ні справядлівымі», — сказала афіцыйная прадстаўніца кіраўніка эўрапейскай дыпляматыі Мая Кацыянчыч у чацьвер на брыфінгу ў Брусэлі, камэнтуючы пераабраньне Мадура.